دولہے کے قاتلوں کو پناہ دینے والے 8 افراد گرفتار

جونپور، 03 مئی (ہ س)۔ یوپی کے جونپور میں انسدادِ جرائم مہم کے تحت کھیتاسرائے تھانہ پولیس کو بڑی کامیابی ملی ہے۔ سینئر سپرنٹنڈنٹ آف پولیس کنور انوپم سنگھ کی ہدایت پر پولیس ٹیم نے بارات کی روانگی کے دوران بیچ سڑک پر دولہے کو گولی مار کر قتل کرنے والے 25-25 ہزار روپے کے انعامی مطلوب ملزمان کو پناہ دینے اور فرار ہونے میں مدد کرنے والے 8 ساتھیوں کو ہفتہ کی دیر رات گرفتار کر لیا ہے۔

یہ کارروائی ایڈیشنل سپرنٹنڈنٹ آف پولیس (سٹی) آیوش شریواستو کی ہدایت اور علاقائی افسر (سی او) شاہ گنج گریندر سنگھ کی قیادت میں کی گئی۔ اتوار کو معاملے کی جانکاری دیتے ہوئے سی او شاہ گنج گریندر سنگھ نے بتایا کہ کھیتاسرائے تھانہ میں درج مقدمے میں مطلوب ملزمان پر 25-25 ہزار روپے کا انعام مقرر ہے۔ ان ملزموں کو سونگر موڑ پر واقع قبرستان کے پاس پناہ دینے اور انہیں فرار ہونے میں تعاون کرنے والے 8 افراد کو گرفتار کر لیا گیا ہے۔ پولیس نے گرفتار ملزمان کے خلاف متعلقہ دفعات کے تحت مقدمہ درج کر لیا ہے اور سبھی کو قانونی کارروائی پوری کرتے ہوئے عدالت بھیجا جا رہا ہے۔

گرفتار شدگان میں رام جیت وند، آدتیہ گوتم، کملیش یادو، گلشن راج بھر، ساحل راج بھر، سچن راج بھر، شعلے راج بھر اور برج موہن وند شامل ہیں۔ سرکل افسر نے کہا کہ مجرموں کے خلاف مہم مسلسل جاری رہے گی اور انہیں پناہ دینے والوں کے خلاف بھی سخت کارروائی کی جائے گی۔

ہندوستھان سماچار

---------------

ہندوستان سماچار / انظر حسن