سیوان، 28 مئی (ہ س)۔ضلع میں بڑہریا تھانہ علاقہ کلے پورینا گاؤں میں بدھ کی رات رشتوں کو شرمسار کرنے والا سنسنی خیز معاملہ سامنے آیا ہے۔ جہاں ایک نوجوان کو مبینہ طور پر اس کے سسرال میں بلا کر بے دردی سے مارا پیٹا گیا اور پھر اسے پٹرول چھڑک کر زندہ جلانے کی کوشش کی گئی۔واقعہ سے علاقہ میں خوف و ہراس کی فضاء پھیل گئی ہے۔ زخمی نوجوان کی شناخت آدتیہ کمار راوت ولد نند کشور راوت ساکن بالاپور کے طور پر کی گئی ہے۔بری طرح جھلسے آدتیہ نے بتایا کہ اس کی شادی پورینا گاؤں میں طے کی گئی تھی۔ اسے بدھ کی صبح اس کے سسرال والوں نے فون پر گاؤں بلایا ۔ وہ سیوان سے پوریناپہنچا، جہاں وہ کام کرتا ہے۔الزام ہے کہ رات تقریباً ساڑھے گیارہ بجے نصف درجن لوگوں نے اسے گھیر لیا۔ پہلے اسے شدید مارا پیٹا گیا، پھر اس کے جسم پر پٹرول چھڑک کر آگ لگا دی گئی۔ آگ کے شعلوں میں گھرا نوجوان کسی طرح فرار ہونے میں کامیاب ہو گیا اور تشویشناک حالت میں گھر پہنچا۔اس کے اہل خانہ اسے سیوان صدر اسپتال لے گئے، جہاں اس کا علاج شروع ہوا۔ حالانکہ علاج کے دوران لواحقین ڈاکٹر سے مشورہ کیے بغیر اسپتال سے چلے گئے۔ واقعے کے پیچھے کی وجہ تاحال واضح نہیں ہے۔واقعہ سے علاقہ میں سنسنی پھیل گئی ہے۔ سوال اٹھائے جا رہے ہیں کہ نوجوان کو کیوں بلایا گیا اور اس طرح کی ہولناک واردات کو انجام دیا گیا۔ پولیس معاملے کی تحقیقات کر رہی ہے۔

ہندوستھان سماچار

ہندوستان سماچار / Mohammad Afzal Hassan