بنگلورو، 28 مئی (ہ س)۔ سدارامیا جمعرات کو کرناٹک کے وزیر اعلی کے عہدے سے استعفی دینے کے بعد جذباتی نظر آئے۔ انہوں نے کہا کہ چونکہ گورنر شہر میں موجود نہیں تھے اس لئے انہوں نے اپنا استعفیٰ گورنر کے سیکرٹری کو سونپ دیا۔

استعفیٰ دینے کے بعد انہوں نے ایک پریس کانفرنس میں کہا، گورنر شہر میں نہیں ہیں، مجھے ان کے دفتر سے اطلاع ملی کہ وہ دیررات واپس آئیں گے، اس لیے میں نے اپنا استعفیٰ ان کے سیکریٹری کو پیش کر دیا ہے، مجھے یقین ہے کہ گورنر کے واپس آنے کے بعد میرا استعفیٰ منظور کر لیا جائے گا۔

سدارامیا نے واضح کیا کہ اعلیٰ کمان سے ہدایات ملتے ہی انہوں نے استعفیٰ دے دیا۔ انہوں نے کہا کہ میں نے ہمیشہ کہا تھا کہ جب بھی ہائی کمان سے ہدایت ملے گی میں استعفیٰ دے دوں گا، میں نے ہدایت ملنے کے بعد استعفیٰ دے دیا۔

اپنے سیاسی کیرئیر کو یاد کرتے ہوئے انہوں نے کہا، میں ایک گاوں سے آیا ہوں، میں نے کبھی سوچا بھی نہیں تھا کہ میں ایم ایل اے یا وزیر اعلی بنوں گا۔ میرا سیاست میں آنا ایک اتفاق تھا۔ میرے خاندان میں کوئی بھی سیاست میں نہیں تھا۔

انہوں نے اپنے نظریاتی اصولوں کا اظہار کرتے ہوئے کہا، میں بدھ، بساونا، ڈاکٹر بی آر امبیڈکر اور مہاتما گاندھی کے نظریات پر یقین رکھتا ہوں۔ میرا یقین ہے کہ آئین ہمارا مذہب ہے۔

آنجہانی کنڑ اداکار ڈاکٹر راجکمار کا ذکر کرتے ہوئے سدارامیا نے کہا، راجکمار اپنے مداحوں کو بھگوان کہتے تھے۔ میں ایک سیاست دان ہوں اور میرے لیے ووٹر بھگوان ہیں۔ میری خوش قسمتی ہے کہ مجھے کرناٹک کے 7 کروڑ لوگوں کی خدمت کرنے کا موقع ملا ہے۔

سونیا گاندھی اور راہل گاندھی سے اظہار تشکر کرتے ہوئے انہوں نے کہا کہ مجھے دو بار وزیر اعلیٰ اور دو بار اپوزیشن لیڈر بننے کا موقع ملا، میں اس کے لیے کانگریس ہائی کمان کا شکر گزار ہوں۔

انہوں نے کہا کہ 2006 میں کانگریس پارٹی میں شامل ہونے کے بعد انہیں پارٹی کارکنوں، ایم ایل ایز اور ممبران پارلیمنٹ سے بے پناہ محبت اور حمایت ملی۔ انہوں نے کہا کہ میں نے 2013 سے 2018 تک پہلی بار وزیر اعلیٰ کے طور پر خدمات انجام دیں۔ اس کے بعد مجھے 2023 سے اب تک دوبارہ وزیر اعلیٰ کے طور پر کام کرنے کا موقع ملا۔ میں ہر اس شخص کا شکر گزار ہوں جنہوں نے میرے ساتھ کام کیا۔

سدارامیا کی سیاسی زندگی

سدارامیا نے کرناٹک کے وزیر اعلیٰ کے عہدے سے استعفیٰ دے دیا ہے، لیکن ان کا استعفیٰ گورنر کی منظوری کے بعد نافذ ہوگا۔ ان کے سیاسی کیرئیر پر نظر ڈالیں تو، سدارامیا، جو ریاست کے سب سے نمایاں کانگریس رہنماو¿ں میں سے ایک ہیں، نے 2013 سے 2018 تک وزیر اعلیٰ کے طور پر خدمات انجام دیں۔ وزیر اعلی کے طور پر ان کی دوسری میعاد مئی 2023 میں کرناٹک میں کانگریس کی زبردست جیت کے ساتھ شروع ہوئی۔ ان کا سیاسی کیریئر 40 سال پر محیط ہے اور وہ ریاست کے ایک ممتاز رہنما ہیں۔

3 اگست 1948 کو میسور (اب میسورو) ضلع کے سدارامناہنڈی گاو¿ں میں ایک کسان خاندان میں پیدا ہوئے، سدارامیا اپنے خاندان میں گریجویشن کرنے والے پہلے فرد تھے۔ اس نے بی ایس سی کی ڈگری حاصل کی۔ اور میسور یونیورسٹی سے قانون (ایل ایل بی) کی ڈگری حاصل کی۔ ان کا سیاسی کیریئر 1980 کی دہائی میں شروع ہوا۔ وہ پہلی بار 1983 میں بھارتیہ لوک دل کے ٹکٹ پر انتخاب لڑ کر کرناٹک قانون ساز اسمبلی میں داخل ہوئے۔ اپنے سیاسی کیریئر کے اوائل میں، وہ جنتا دل اور جنتا دل (سیکولر) جیسی جماعتوں سے وابستہ رہے۔ جنتا دل (سیکولر) کے رکن کے طور پر، انہوں نے دو بار کرناٹک کے نائب وزیر اعلیٰ کے طور پر خدمات انجام دیں۔ 2006 میں انہوں نے کانگریس پارٹی میں شمولیت اختیار کی۔

---------------

ہندوستان سماچار / عبدالسلام صدیقی