وارانسی، 27 مئی (ہ س)۔مرکز میں نریندر مودی حکومت کے 12سال مکمل ہونے پر بدھ کو ان کے پارلیمانی حلقہ وارانسی میں میٹروپولیٹن کانگریس کمیٹی نے ایک پوسٹر جاری کیا ۔ پوسٹر جاری کرنے کے بعد میٹروپولیٹن کانگریس کے صدر راگھویندر چوبے نے مرکزی حکومت کی پالیسیوں اور کام کرنے کے انداز پر سخت تنقید کی۔ چوبے نے کہا کہ یہ 12 سال کا عرصہ کامیابیوں سے زیادہ تشہیر، ایونٹ مینجمنٹ اور عوامی جذبات کے استحصال سے متعلق ثابت ہوا ہے۔
انہوں نے کہا کہ بات چیت پر تکبر کو ترجیح دی گئی۔ تشہیر کی چکا چوند سے عوام کے دکھوں کوچھپایا نہیں جا سکتا۔ جس حکومت نے ’’اچھے دنوں‘‘ کا خواب دکھایا تھا، اسی دور میں عام شہری مہنگائی، بے روزگاری اور عدم تحفظ کے بوجھ تلے دب گیا۔ میٹروپولیٹن صدر نے کہا کہ ’’جمہوریت میں حکومتیں پبلسٹی سے نہیں بلکہ احتساب کے ذریعے عظیم بنتی ہیں۔ ملک اب صرف نعروں سے نہیں بلکہ 12 سال کا واضح حساب مانگ رہا ہے۔‘‘
میٹروپولیٹن صدر نے سوال کیا کہ اگر ملک حقیقی معنوں میں ترقی کر رہا ہے تو عوام کھانا پکانے کی گیس، پٹرول، ڈیزل اور اشیائے خوردونوش کی مسلسل بڑھتی ہوئی قیمتوں سے کیوں پریشان ہے؟ لاکھوں نوکریاں دینے کا دعویٰ کرنے والی حکومت کے دور میں نوجوان بھرتی کے امتحانات، پیپر لیک ہونے اور کنٹریکٹ سسٹم کے جال میں الجھے رہے۔ انہوں نے کہا کہ حکومت ملازمتیں کم اور اشتہارات زیادہ پیدا کر رہی ہے۔ بیٹی بچاؤ کا نعرہ زمینی سطح پر تحفظ میں تبدیل نہیں ہوسکا۔ خواتین کے خلاف بڑھتے ہوئے جرائم نے حکومت کی حساسیت پر سنگین سوالات کھڑے کر دیے ہیں۔ بڑی بڑی تقاریر کے باوجود سرحدوں پر کشیدگی اور اندرونی عدم استحکام نے حکومت کی اسٹریٹجک تیاریوں کو بے نقاب کر دیا ہے۔
خارجہ پالیسی پر تنقید کرتے ہوئے انہوں نے کہا کہ کیمروں کے فلیش میں سفارتکاری کامیاب دکھائی جاسکتی ہے لیکن پڑوسی ممالک کے ساتھ بگڑتے تعلقات حقیقت کو بے نقاب کرتے ہیں۔ میٹروپولیٹن صدر نے 2016 کے نوٹ بندی کو ملک کے معاشی ڈھانچے پر ایک خودکش حملہ قرار دیتے ہوئے کہا کہ اس نے کالے دھن کو ختم نہیں کیا، بلکہ چھوٹے تاجروں، مزدوروں اور متوسط طبقے کو مالی طور پر تباہ کر دیا۔
انہوں نے الزام لگایا کہ جمہوری اداروں کو غیر جانبداری کی بجائے سیاسی دباؤ بنانے کے آلے کے طور پر استعمال کیا جا رہا ہے۔ انہوں نے کہا کہ جو اقتدارکے ساتھ ہے ، وہ مقدس ہے اور جو سوال کرے وہی مشتبہ قرار دیا جاتا ہے۔‘‘ بے روزگاری اور مہنگائی جیسے بنیادی مسائل سے توجہ ہٹانے کے لیے معاشرے میں تفرقہ انگیز گفتگو کو فروغ دیا گیا۔
ہندوستھان سماچار
ہندوستان سماچار / محمد شہزاد
