ولیم نگر (میگھالیہ)، 27 مئی (ہ س):۔
نوجوانوں کے امور اور کھیلوں کی مرکزی وزیر مملکت رکشا کھڈسے نے بدھ کو میگھالیہ کے مشرقی گارو ہلز ضلع کے ولیم نگر کا دورہ کیا۔ دورے کے دوران، انہوں نے ضلع میں کھیلوں کی سہولیات کا معائنہ کیا اور نچلی سطح پر کھیلوں کے بنیادی ڈھانچے کو مضبوط بنانے کی کوششوں کا جائزہ لیا۔ انہوں نے ولیم نگر کے آر جی ایچ ایس ایس اسپورٹس گراو¿نڈ میں مصنوعی فٹ بال ٹرف کا دورہ کیا اور خطے میں نوجوان کھلاڑیوں کو بہتر سہولیات فراہم کرنے کی ضرورت پر زور دیا۔
اس دورے کا اہتمام شمال مشرقی خطہ کی ترقی کی وزارت ( ایم ڈی او این آر) کے نارتھ ایسٹ کنیکٹیویٹی برج پہل کے تحت کیا گیا تھا۔ اس اقدام کا مقصد مرکزی اور ریاستی حکومتوں کے درمیان تال میل کو مضبوط کرنا، ترقیاتی منصوبوں کا زمینی جائزہ لینا اور شمال مشرقی خطے میں ترقیاتی کاموں کو تیز کرنا ہے۔
دورے کے دوران، کھیلوں کے وزیر مملکت نے تامبو آڈنگ میں زیر تعمیر کھیلو انڈیا ملٹی پرپز انڈور ہال کی پیش رفت کا بھی جائزہ لیا۔ انہوں نے کہا کہ مرکزی حکومت شمال مشرق میں کھیلوں کے جدید انفراسٹرکچر کو ترقی دینے کے لیے پرعزم ہے۔
مرکزی وزیر نے ماہی پروری اور مویشی پروری سے متعلق اسکیموں کا بھی جائزہ لیا۔ انہوں نے دیہی معیشت کو مضبوط بنانے اور مقامی لوگوں کے لیے روزگار کے پائیدار مواقع بڑھانے پر زور دیا۔ حکام کے ساتھ بات چیت میں پیداواری صلاحیت میں اضافہ، مقامی صلاحیت کو بڑھانے اور اقتصادی مواقع کو بڑھانے پر توجہ مرکوز کی گئی۔
ہندوستھان سماچا ر
ہندوستان سماچار / عطاءاللہ
