رانچی، 27 مئی (ہ س)۔ ریاست کے دارالحکومت رانچی سمیت 20 اضلاع میں جمعرات کو بارش، تیز آندھی اور آسمانی بجلی گرنے کی توقع ہے۔ محکمہ موسمیات نے بدھ کو اورنج الرٹ جاری کیا۔ کئی علاقوں میں 50 سے 60 کلومیٹر فی گھنٹہ کی رفتار سے تیز ہوائیں چلنے کا امکان ہے، جس سے لوگوں کو محتاط رہنے کا مشورہ دیا گیا ہے۔
محکمہ موسمیات کے مطابق، ریاست کے بیشتر علاقوں میں موسم مختلف رہے گا۔ تاہم شمال مغربی جھارکھنڈ کے چار اضلاع- گڑھوا، پلامو، لاتیہار اور چترا میں جمعرات کو بارش ہونے کی کم توقع ظاہر کی گئی ہے۔ باقی اضلاع میں گرج چمک کے ساتھ ہلکی سے درمیانی بارش متوقع ہے۔
محکمہ نے یہ بھی کہا ہے کہ 2 جون تک ریاست کے مختلف اضلاع میں موسم غیر مستحکم رہ سکتا ہے۔ اس دوران کئی مقامات پر گرج چمک کے ساتھ آسمانی بجلی گرنے اور 40 سے 50 کلومیٹر فی گھنٹہ کی رفتار سے ہوائیں چلنے کا امکان ہے۔ اس حوالے سے محکمہ موسمیات کی جانب سے ایلو الرٹ بھی جاری کر دیا گیا ہے۔ ماہرین موسمیات نے لوگوں کو اس خراب موسم میں کھلے میدانوں، درختوں اور بجلی کے کھمبوں سے دور رہنے کا مشورہ دیا ہے۔
دریں اثنا، گزشتہ 24 گھنٹوں کے دوران ریاست کے کئی علاقوں میں موسم بدل گیا۔ پاکورڑضلع کے پاکوڑیا میں سب سے زیادہ 16 ملی میٹر بارش درج کی گئی۔اس کے علاوہ امرپارہ، مہیش پور، مہگاؤں، بواریجور، پتھرگاما اور مجھگاؤں سمیت کئی علاقوں میں بھی ہلکی بارش ہوئی، جس سے گرمی سے کچھ راحت ملی۔
درجہ حرارت کے بارے میں بات کریں تو ریاست میں سب سے زیادہ درجہ حرارت ڈالٹن گنج میں 43.5 ڈگری سیلسیس ریکارڈ کیا گیا، جب کہ سب سے کم درجہ حرارت گوڈا میں 21.7 ڈگری سیلسیس ریکارڈ کیا گیا۔
بدھ کے روز دارالحکومت رانچی اور آس پاس کے علاقوں میں صبح سے دوپہر تک موسم صاف رہا، لیکن آسمان ابر آلود ہو گیا اور درمیانی ہوا چلنے لگی، جس سے شدید گرمی سے کچھ راحت ملی۔
محکمہ موسمیات کے اعداد و شمار کے مطابق، رانچی میں بدھ کو زیادہ سے زیادہ درجہ حرارت 39.3 ڈگری سیلسیس اور کم سے کم 25.9 ڈگری سیلسیس ریکارڈ کیا گیا۔ جمشید پور میں زیادہ سے زیادہ درجہ حرارت 39.3 ڈگری سیلسیس اور کم سے کم 25.7 ڈگری سیلسیس، ڈالٹن گنج میں زیادہ سے زیادہ 43.5 ڈگری سیلسیس اور کم سے کم 27.3 ڈگری سیلسیس، بوکارو میں زیادہ سے زیادہ 40.5 ڈگری سیلسیس اور کم سے کم 25.7 ڈگری سیلسیس ریکارڈ کیا گیا۔ چائباسا میں زیادہ سے زیادہ 41 ڈگری سیلسیس اور کم سے کم 28.2 ڈگری سیلسیس درجہ حرارت درج کیا گیا۔
محکمہ موسمیات نے لوگوں سے اپیل کی ہے کہ وہ خراب موسم میں غیر ضروری باہر نکلنے سے گریز کریں اور آسمانی بجلی گرنے کی صورت میں محفوظ مقامات پر پناہ لیں۔ کاشتکاروں کو بھی موسم کو دیکھتے ہوئے محتاط رہنے کی صلاح دی گئی ہے۔
ہندوستھان سماچار
ہندوستان سماچار / محمد شہزاد
