ہائیڈروجن ٹرین کو ہری جھنڈی ملنے پر جند کے لوگ خوشی کا اظہار کر رہے ہیں

جند، 27 مئی (ہ س)۔

ریلوے بورڈ نے ہندوستان کی پہلی ہائیڈروجن سے چلنے والی ٹرین کو منظوری دے دی ہے۔ یہ 10 کوچ والی ڈیمو ٹرین ہریانہ کے جند اور سونی پت کے درمیان چلے گی۔ وزارت ریلوے نے اس ٹرین کو ناردرن ریلوے زون کے تحت منظور کیا ہے۔ ٹرین کی زیادہ سے زیادہ رفتار 75 کلومیٹر فی گھنٹہ ہوگی۔ یہ ہائیڈروجن فیول سیلز کا استعمال کرتے ہوئے بجلی پیدا کرے گی اور اس کی کل پاور آو¿ٹ پٹ 1,200 کلو واٹ ہوگی۔ ٹرین ڈسٹری بیوٹڈ پاور رولنگ اسٹاک (ڈی پی آر ایس) ٹیکنالوجی پر چلائے گی۔ ریلوے حکام نے بتایا کہ وزارت کی منظوری ریسرچ ڈیزائنز اینڈ سٹینڈرڈز آرگنائزیشن ( آر ڈی ایس او) سے تکنیکی منظوری کے بعد دی گئی۔ کمشنر آف ریلوے سیفٹی (سی سی آر ایس) نے بھی حال ہی میں جند جنکشن کا دورہ کیا اور حفاظتی معائنہ کیا۔

حکام نے کہا کہ منظوری کا مطلب فوری طور پر کام شروع کرنا نہیں ہے۔ تعمیل کے کئی طریقہ کار اور تصدیقی مراحل ابھی مکمل ہونے ہیں۔ ناردرن ریلوے کے جنرل مینیجر کو تمام تعمیل کی رپورٹ دیگر قانونی حکام، جیسے آر ڈی ایس او، سی سی آر ایس، اور پیٹرولیم اینڈ ایکسپلوسیوز سیفٹی آرگنائزیشن (پی ای ایس او) کو جمع کرنے کی ضرورت ہوگی۔حکومت کی جانب سے ملک کی پہلی ہائیڈروجن ڈیمو ٹرین کو باضابطہ طور پر منظور کیے جانے کے بعد بدھ کو جند ضلع میں جشن اور خوشی کا ماحول تھا۔

جند اور سونی پت کے درمیان چلنے والی یہ جدید ترین ٹرین نہ صرف ملک کی پہلی ہائیڈروجن ٹرین ہوگی بلکہ ماحولیاتی تحفظ کی جانب ایک انقلابی قدم ثابت ہوگی۔ اس تاریخی کامیابی پر خوشی کا اظہار کرتے ہوئے میونسپل کونسل جند کی صدر ڈاکٹر انورادھا سینی نے بدھ کو وزیر اعظم اور وزیر اعلیٰ کا شکریہ ادا کیا۔ انہوں نے کہا کہ یہ جند کے لیے خوش قسمتی کی بات ہے کہ ہمارے ضلع کو پورے ملک میں پہلی ہائیڈروجن ٹرین چلانے کے لیے منتخب کیا گیا ہے۔

ہندوستھان سماچار

ہندوستان سماچار / عطاءاللہ