جموں صوبے میں عید الاضحیٰ کا تہوار مذہبی جوش و جذبے کے ساتھ منایا گیا

جموں، 27 مئی (ہ س)۔ جموں و کشمیر بھر میں سخت سیکورٹی انتظامات کے درمیان عیدالاضحیٰ مذہبی عقیدت و احترام کے ساتھ منائی گئی۔ اس موقع پر مساجد اور عیدگاہوں میں مسلمانوں کے بڑے اجتماعات نے نمازِ عید ادا کی۔

عیدالاضحیٰ، جو حضرت ابراہیمؑ کی قربانی اور اطاعتِ خداوندی کی یاد میں منائی جاتی ہے، پورے جموں و کشمیر میں مذہبی جوش و جذبے کے ساتھ منائی گئی۔جموں میں سب سے بڑا اجتماع ریذیڈنسی روڈ پر واقع عیدگاہ میں دیکھنے کو ملا، جبکہ مکہ مسجد بھٹینڈی اور جامع مسجد تالاب کھٹیکاں میں بھی نمازِ عید کے بڑے اجتماعات منعقد ہوئے۔ صبح سویرے ہزاروں فرزندانِ توحید نے خصوصی نمازِ عید میں شرکت کی۔نمازِ عید کے بعد لوگوں نے سنتِ ابراہیمی پر عمل کرتے ہوئے بھیڑ، بکریوں اور دیگر جانوروں کی قربانی پیش کی، جو اللہ تعالیٰ کی رضا اور اطاعت کی علامت ہے۔

مذہبی رہنماؤں نے اس موقع پر عوام کو عید کی مبارکباد پیش کرتے ہوئے جموں و کشمیر سمیت پوری دنیا میں امن، خوشحالی اور بھائی چارے کے لیے دعائیں کیں۔ عید کے پرامن انعقاد کو یقینی بنانے کے لیے سیکورٹی فورسز نے حساس مقامات پر سخت نگرانی رکھی۔

جامع مسجد کھٹیکاں تالاب کے شاہی امام اور معروف سنی عالم دین مفتی عنایت اللہ قاسمی نے بھی عوام کو عید کی مبارکباد دیتے ہوئے خطے میں امن، ترقی اور خوشحالی کے لیے دعا کی۔انہوں نے میڈیا سے گفتگو کرتے ہوئے کہا کہ جموں و کشمیر بھر میں عیدالاضحیٰ عقیدت، اتحاد اور بھائی چارے کے ماحول میں منائی جا رہی ہے۔ انہوں نے دعا کی کہ اللہ تعالیٰ سب کو خوشیاں، سکون، اچھی صحت اور راحت عطا فرمائے۔

ہندوستھان سماچار

---------------

ہندوستان سماچار / محمد اصغر