ممبئی ، 27 مئی (ہ س) ممبئی ایئرپورٹ پر محکمہ کسٹمز کی ٹیم نے ایک فوڈ اسٹور میں کام کرنے والے 24 سالہ ملازم کو گرفتار کرکے اس کے قبضے سے 1.21 کلوگرام اسمگل شدہ سونا برآمد کیا ہے۔ ضبط کیے گئے سونے کی قیمت تقریباً 1.77 کروڑ روپے بتائی گئی ہے۔

اس معاملے کی جانچ کر رہے کسٹمز افسر نے بدھ کو بتایا کہ ممبئی ایئرپورٹ احاطے میں واقع ایک فوڈ اسٹور کے ملازم پر سونے کی اسمگلنگ میں ملوث ہونے کا شبہ تھا۔ اسی بنیاد پر منگل کے روز اسے ایئرپورٹ کے ٹرمینل-2 کے ڈپارچر ایریا کے قریب پی-10 مقام پر روکا گیا۔ تلاشی کے دوران ملازم کے قبضے سے 1,210 گرام سونا برآمد کیا گیا۔ گرفتار ملازم کی شناخت وی پی یڈی کر کے طور پر ہوئی ہے، جو ضلع سانگلی کا رہنے والا بتایا گیا ہے۔

پوچھ تاچھ کے دوران یڈی کر نے اعتراف کیا کہ برآمد شدہ سونا اس کا نہیں تھا بلکہ وہ اسے کسی دوسرے شخص تک پہنچانے کے لیے لے جا رہا تھا۔ جانچ میں یہ بھی سامنے آیا ہے کہ ملزم نے مبینہ طور پر ایک ٹرانزٹ مسافر سے 8 ہزار روپے کے عوض یہ سونا حاصل کیا تھا۔ کسٹمز حکام کو شبہ ہے کہ یہ معاملہ ایئرپورٹ کے ذریعے سرگرم کسی بڑے سونے کی اسمگلنگ نیٹ ورک سے جڑا ہو سکتا ہے۔ حکام کے مطابق معاملے کی تفتیش ابھی ابتدائی مرحلے میں ہے اور مزید جانچ جاری ہے۔

ہندوستھان سماچار

--------------------

ہندوستان سماچار / جاوید این اے