بھوپال، 27 مئی (ہ س)۔ مدھیہ پردیش کے دارالحکومت بھوپال کے کروند علاقے میں منگل کی گزشتہ رات ایک گھر میں لگی خوفناک آگ نے پورے علاقے میں افراتفری مچا دی۔ نشاط پورہ تھانہ علاقے میں واقع کورل کاسا بنگلو کے ایک مکان میں اچانک آگ بھڑک اٹھی۔ آگ لگنے کے کچھ ہی دیر بعد ایئر کنڈیشنر (اے سی) میں زوردار بلاسٹ ہوا، جس سے شعلے تیزی سے پورے گھر میں پھیل گئے۔ اس واقعے میں گھر کا تقریباً پورا گھریلو سامان جل کر خاک ہو گیا۔ تاہم وقت رہتے خاندان کے اراکین باہر نکل آئے، جس سے بڑا حادثہ ٹل گیا۔

عینی شاہدین کے مطابق رات قریب 10 بجے گھر سے دھواں اٹھتا دکھائی دیا۔ دیکھتے ہی دیکھتے آگ نے خوفناک شکل اختیار کر لی۔ اسی دوران اے سی میں تیز دھماکہ ہوا، جس کی آواز سن کر آس پاس کے لوگ گھروں سے باہر نکل آئے۔ دھماکے کے بعد علاقے میں افرا تفری کا ماحول پیدا ہو گیا۔ گھر میں موجود خاندان نے حالات بگڑتے دیکھ کر فوری طور پر باہر نکل کر اپنی جان بچائی۔ اطلاع ملتے ہی فائر بریگیڈ کی ٹیم جائے وقوع پر پہنچی۔ فائر فائٹر پنکج یادو اور ان کی ٹیم نے سخت مشقت کے بعد آگ پر قابو پایا۔ مقامی کونسلر لکی رائے اور کالونی کے رہائشیوں نے بھی آگ بجھانے میں مدد کی۔ رہائشیوں نے پانی اور دیگر وسائل فراہم کیے، جس سے آگ کو آس پاس کے مکانات تک پھیلنے سے روکا جا سکا۔

آگ اتنی خوفناک تھی کہ گھر کے اندر رکھا فرنیچر، الیکٹرانک آلات، کپڑے اور دیگر گھریلو سامان پوری طرح جل گیا۔ آگ کی زد میں آنے سے مکان کے کئی حصوں کو بھی بھاری نقصان پہنچا ہے۔ راحت کی بات یہ رہی کہ اس حادثے میں کوئی جانی نقصان نہیں ہوا۔

فائر بریگیڈ کی ابتدائی جانچ میں آگ لگنے کی وجہ شارٹ سرکٹ مانی جا رہی ہے۔ افسران کے مطابق بجلی سے جڑے حصے میں اسپارکنگ کے بعد آگ لگی، جو اے سی بلاسٹ کے سبب تیزی سے پھیل گئی۔ فائر فائٹر پنکج یادو نے بتایا کہ آگ اتنی تیزی سے پھیلی کہ خاندان کو سامان نکالنے کا موقع تک نہیں ملا۔ فائر بریگیڈ ٹیم نے وقت رہتے آگ پر قابو پا کر آس پاس کے گھروں کو بھی محفوظ کیا۔ احتیاط کے طور پر کچھ وقت کے لیے علاقے کی بجلی کی سپلائی بھی بند رکھی گئی۔

ہندوستھان سماچار

ہندوستان سماچار / انظر حسن