ممبئی ، 27 مئی (ہ س) سانتا کروز ڈپو میں بدھ کی رات بیسٹ کی ایک بس میں اچانک آگ لگ گئی۔ خوش قسمتی سے بروقت کارروائی کرتے ہوئے آگ پر قابو پا لیا گیا، جس کے باعث کوئی جانی نقصان نہیں ہوا۔ بیسٹ انتظامیہ کی جانب سے دی گئی معلومات کے مطابق ماتیشوری کمپنی کی ٹھیکے پر لی گئی ایک بس میں یہ آگ لگی۔ مذکورہ بس کلچ میں خرابی کے باعث ڈپو میں کھڑی تھی۔ مرمت کے بعد ڈرائیور بس کو سانتا کروز ڈپو کے فیول اسٹیشن پر ایندھن بھروانے کے لیے لے جا رہا تھا۔

اسی دوران چلتی بس میں ڈرائیور کے کیبن کے اندر شارٹ سرکٹ ہوگیا، جس کے بعد آگ بھڑک اٹھی۔ واقعے کے فوراً بعد ایم یو ٹی ایس پی پی ایل کے عملے نے آگ بجھانے کے لیے 20 فائر ایکسٹنگوشر استعمال کیے اور فائر بریگیڈ کو بھی طلب کیا گیا۔ اطلاع ملتے ہی موقع پر پہنچی فائر بریگیڈ کی ٹیم نے آگ پر مکمل قابو پا لیا۔ اس واقعے میں کسی کے زخمی ہونے کی اطلاع نہیں ہے۔

قابل ذکر ہے کہ حالیہ دنوں میں پرتکشا نگر ڈپو میں بھی دو بسوں میں آگ لگنے کے واقعات پیش آئے تھے، جبکہ مالاڈ میں ایک بس سے دھواں اٹھنے کا واقعہ بھی سامنے آیا تھا۔

ہندوستھان سماچار

--------------------

ہندوستان سماچار / جاوید این اے