لکھنؤ، 26 مئی (ہ س)۔ اتر پردیش میں شدید گرمی، حبس اور لو سے عام لوگ پریشان ہیں۔ راجدھانی لکھنؤ سمیت ریاست کے کئی اضلاع میں درجۂ حرارت مسلسل معمول سے زیادہ بنا ہوا ہے۔ تیز دھوپ، گرم ہواؤں اور جھلسا دینے والی گرمی نے لوگوں کی مشکلات میں اضافہ کر دیا ہے۔ محکمۂ موسمیات نے منگل کے روز مغربی اور مشرقی اتر پردیش میں کئی مقامات پر موسم خشک رہنے کی پیش گوئی کرتے ہوئے 30 سے 40 کلومیٹر فی گھنٹہ کی رفتار سے گرد آلود تیز ہوائیں چلنے، گرج چمک کے ساتھ بارش کی پھواریں پڑنے کا امکان ظاہر کیا ہے۔

لکھنؤ میں منگل کے روز بھی شدید گرمی اور لو کا قہر جاری ہے۔ یہاں زیادہ سے زیادہ درجۂ حرارت 42 سے 45 ڈگری سیلسیس کے درمیان رہنے کا امکان ہے جبکہ کم سے کم درجۂ حرارت تقریباً 32 ڈگری سیلسیس رہنے کی توقع ہے۔ پورے دن تیز دھوپ اور گرم ہوائیں چلیں گی، تاہم شام کے وقت موسم صاف اور گرم رہے گا۔ اگرچہ آج منگل کو بڑا منگل ہونے کی وجہ سے جگہ جگہ بھنڈاروں اور پانی کی سبیلوں کے انتظام سے لوگوں کو کافی راحت مل رہی ہے۔

لکھنؤ، کانپور، آگرہ، پریاگ راج، وارانسی، بلیا، سونبھدر، مرزاپور، بندیل کھنڈ اور مغربی یوپی کے کئی اضلاع میں شدید گرمی اور حبس نے لوگوں کو بے حال کر رکھا ہے۔ گزشتہ کئی دنوں سے درجۂ حرارت مسلسل 40 ڈگری سیلسیس سے اوپر بنا ہوا ہے۔ ان اضلاع میں ہلکی بارش، آسمانی بجلی اور گرد آلود آندھی چلنے کا امکان ہے۔

محکمۂ موسمیات کے مطابق، اتر پردیش میں فعال ہو رہی ٹھنڈی پُروائی ہوائیں اور شمالی ہندوستان کی طرف بڑھنے والا نیا مغربی طوفانی نظام موسم کا رخ بدل سکتا ہے۔ اس کے اثر سے 28 مئی کے آس پاس لکھنؤ سمیت پورے اتر پردیش میں بارش، آندھی اور گرج چمک ہونے کا امکان ہے، جس سے ہیٹ ویو سے راحت مل سکتی ہے۔

محکمۂ موسمیات لکھنؤ مرکز کے سائنس دان اتُل کمار سنگھ کے مطابق، اس وقت وسطی ہندوستان کے اوپر ایک اینٹی سائیکلون بنا ہوا ہے، جس کی وجہ سے گرم اور خشک پچھوا ہوائیں اتر پردیش کے جنوبی حصوں میں سرگرم ہیں۔ یہی سبب ہے کہ ریاست میں گرمی اور لو کا اثر برقرار ہے۔ تاہم اب نچلی فضائی سطح میں پُروائی ہوائیں سرگرم ہونے سے شمالی ہندوستان میں ایک نیا مغربی طوفانی نظام بھی فعال ہونے والا ہے۔ ایسے میں جب یہ دونوں موسمی نظام ایک دوسرے کے اثر میں آئیں گے تو ریاست کے کئی اضلاع میں بارش، آندھی اور گرج چمک کے ساتھ بارش کی چھینٹیں پڑ سکتی ہیں۔

ہندوستھان سماچار

---------------

ہندوستان سماچار / عبدالواحد