یکم تا 10 جون بوتھ سطح نمائندوں کی رجسٹریشن مکمل کرنے کا ہدف مقررممبئی، 26 مئی (ہ س)۔ ملک بھر میں الیکشن کمیشن کی جانب سے چلائی جا رہی ’ایس آئی آر‘ یعنی خصوصی ادارہ جاتی جائزہ اور ووٹر لسٹ تصدیقی مہم کے پس منظر میں شیوسینا (ادھو بالا صاحب ٹھاکرے) گروپ نے اب جارحانہ اور محتاط موقف اختیار کر لیا ہے۔ بعض ریاستوں میں اس عمل کے دوران بڑی تعداد میں ووٹروں کے نام ووٹر فہرستوں سے حذف کیے جانے کے الزامات سامنے آئے تھے، جبکہ اپوزیشن جماعتوں نے دعویٰ کیا تھا کہ اس کا سب سے زیادہ نقصان مخالف پارٹیوں کو اٹھانا پڑا۔ اسی پس منظر میں ٹھاکرے گروپ نے مہاراشٹر میں اس عمل کے آغاز کے ساتھ ہی اپنی تنظیمی سرگرمیاں تیز کر دی ہیں۔پیر کی شب دادَر کے شیوسینا بھون میں پارٹی لیڈر آدتیہ ٹھاکرے کی موجودگی میں ممبئی کے سابق کارپوریٹروں، ڈویژن سربراہوں اور شاخہ پرمکھوں کی ایک اہم میٹنگ منعقد ہوئی۔ اس موقع پر آدتیہ ٹھاکرے نے آئندہ انتخابات کے تناظر میں ’ایس آئی آر‘ عمل کو انتہائی سنجیدگی سے لینے کی ہدایت دیتے ہوئے کہا کہ اس معاملے میں کوئی بھی لاپروائی نہ برتی جائے، ورنہ دیگر ریاستوں کی طرح مہاراشٹر میں بھی سنگین صورتحال پیدا ہو سکتی ہے۔میٹنگ کے دوران آدتیہ ٹھاکرے نے بہار اور مغربی بنگال کی صورتحال کا حوالہ دیتے ہوئے کہا کہ ان ریاستوں میں ’ایس آئی آر‘ عمل کے لیے انتہائی کم وقت دیا گیا تھا، لیکن مہاراشٹر میں اس وقت مناسب وقت دستیاب ہے، اس لیے ہر عہدیدار کو ذمہ داری اور احتیاط کے ساتھ کام کرنا ہوگا۔ انہوں نے واضح کیا کہ اگرچہ انتخابات میں ابھی تین سال باقی ہیں، لیکن جیسے ہی مقامی سطح پر ’ایس آئی آر‘ عمل شروع ہو، ہر ذمہ دار کو خود ووٹر فہرستوں کی جانچ میں سرگرم کردار ادا کرنا چاہیے۔دریں اثنا، ٹھاکرے گروپ نے اپنی حکمت عملی کے تحت یکم جون سے 10 جون کے درمیان ’بی ایل اے‘ یعنی بوتھ سطح نمائندہ رجسٹریشن مکمل کرنے کا ہدف مقرر کیا ہے۔ پارٹی کی جانب سے ممبئی کے تمام شاخہ پرمکھوں کو ہدایت دی گئی ہے کہ ہر ووٹر لسٹ کے لیے بوتھ سطح نمائندوں کی تقرری لازمی بنائی جائے اور زیادہ سے زیادہ نمائندوں کا اندراج کیا جائے۔میٹنگ سے یہ بھی واضح ہوا کہ ووٹر فہرستوں میں ممکنہ چھیڑ چھاڑ کو روکنے اور ہر ووٹر کا نام محفوظ رکھنے کے مقصد سے ٹھاکرے گروپ نے ابھی سے میدان میں اترتے ہوئے اپنی تنظیمی تیاریوں کو عملی شکل دینا شروع کر دیا ہے۔

ہندوستھان سماچار

ہندوستان سماچار / جاوید این اے