بھوپال، 26 مئی (ہ س)۔

مدھیہ پردیش کے دارالحکومت بھوپال میں داودی بوہرہ برادری نے عیدالاضحیٰ (بقرعید) کا مقدس تہوار منگل کے روز پورے مذہبی جوش و خروش، سادگی اور عقیدت کے ساتھ منایا۔ اس موقع پر صبح سے ہی شہر کی بوہرہ مسجدوں میں خصوصی رونق اور خوشی دیکھنے کو ملی۔ برادری کے لوگوں نے خصوصی نماز ادا کر کے ملک میں امن، بھائی چارے اور ترقی کی دعا مانگی۔

منگل کی صبح سے ہی بھوپال کے جمعراتی میں واقع علی گنج حیدری مسجد سمیت دارالحکومت کے مختلف علاقوں میں واقع بوہرہ برادری کی مسجدوں میں نمازیوں کا تانتا لگنا شروع ہو گیا تھا۔ برادری کے مرد، بزرگ اور بچے اپنے روایتی سفید لباس اور ٹوپی زیب تن کرکے مسجدوں میں پہنچے۔ مسجدوں میں علمائے دین کے ذریعے عید کا خصوصی خطبہ پڑھا گیا، جس کے بعد سبھی نے اجتماعی طور پر عیدالاضحیٰ کی خصوصی نماز ادا کی۔ نماز کے دوران برادری کے لوگوں نے بارگاہِ الٰہی میں سر جھکا کر ملک میں امن و امان، خوشحالی، باہمی بھائی چارے اور ہمہ جہت ترقی کے لیے خصوصی دعائیں مانگیں۔ نماز کے بعد مسجد کے احاطے اور باہر کا نظارہ بیحد خوشگوار رہا۔ لوگوں نے ایک دوسرے کو گلے لگا کر ’عید مبارک‘ کہا اور تہوار کی مبارکباد دی۔ بچوں میں عید کو لے کر زبردست جوش و خروش دیکھا گیا۔

داودی بوہرہ برادری کے میڈیا کوآرڈینیٹر ابراہیم علی داودی نے تہوار کے منظم انعقاد کو لے کر شہر کے ضلع انتظامیہ، بھوپال پولیس اور نگر نگم کے عملے کا خصوصی شکریہ ادا کیا۔ انہوں نے کہا کہ انتظامی مستعدی اور تعاون کی بدولت برادری کا یہ بڑا تہوار بیحد پرامن، صاف ستھرے اور بہتر طریقے سے اختتام پذیر ہوا ہے۔ اس کے ساتھ ہی انہوں نے تمام بھوپال واسیوں کو عید کی دلی مبارکباد دیتے ہوئے معاشرے میں باہمی ہم آہنگی اور بھائی چارے کی جڑوں کو مزید مضبوط کرنے کا پیغام دیا۔ قابلِ ذکر ہے کہ داودی بوہرہ برادری میں بقرعید کا تہوار دیگر مسلم طبقوں کے مقابلے عموماً ایک دن پہلے منایا جاتا ہے۔

ہندوستھان سماچار

ہندوستان سماچار / انظر حسن