کولکاتا، 24 مئی (ہ س)۔

بھارتیہ جنتا پارٹی (بی جے پی) نے مغربی بنگال کی فلتااسمبلی سیٹ پر بھاری اکثریت سے کامیابی حاصل کرتے ہوئے ترنمول کانگریس کے مضبوط گڑھ کو منہدم کردیا۔ بی جے پی امیدوار دیباشیش پانڈا نے 100,000 ووٹوں کے بھاری فرق سے کامیابی حاصل کی۔ اس نتیجے کو ریاست کی سیاست میں ایک بڑی تبدیلی کی علامت کے طور پر دیکھا جا رہا ہے۔

انتخابی نتائج کے اعلان کے بعد، وزیر اعلی شبھیندو ادھیکاری نے ترنمول کانگریس پر سخت حملہ کیا اور اسے پارٹی کے زوال کی شروعات قرار دیا۔ انہوں نے کہا کہ فلتاکے عوام نے برسوں بعد آزادانہ اور منصفانہ ووٹنگ کرکےجمہوریت کو بحال کیا ہے۔

ضمنی انتخاب کے دوران سب سے زیادہ زیربحث ترنمول کانگریس کے امیدوار جہانگیر خان تھے۔ ووٹنگ سے دو دن قبل انہوں نے مقابلے سے دستبرداری کا اعلان کیا۔ اس کے بعد بی جے پی کی جیت تقریباً یقینی سمجھی جا رہی تھی۔

وزیراعلیٰ شبھیندو ادھیکاری نے انتخابی مہم کے آخری دن بی جے پی امیدوار کی جیت کو 100,000 ووٹوں سے یقینی بنانے کا ہدف رکھا تھا۔ 18 راونڈز کی گنتی کے بعد، بی جے پی امیدوار تقریباً 92,000 ووٹوں سے آگے تھے، حتمی جیت کا مارجن 108,000 سے زیادہ تھا۔

سب سے حیران کن بات یہ تھی کہ گزشتہ لوک سبھا انتخابات میں ترنمول کانگریس کو اس علاقے سے تقریباً 1.70 لاکھ ووٹوں کی برتری حاصل ہوئی تھی، لیکن اس ضمنی انتخاب میں پارٹی کے امیدوار کو صرف ساڑھے پانچ ہزار ووٹ ملے ہیں۔

ووٹنگ کے دوران کئی پولنگ بوتھوں پر ترنمول کانگریس کا کوئی ایجنٹ موجود نہیں تھا۔ گنتی کے مراکز پر پارٹی کی موجودگی بھی کافی کمزور رہی۔

اس ضمنی انتخاب میں بائیں محاذ کے حمایت یافتہ امیدوار شمبھوناتھ کرمی نے تقریباً 37,000 ووٹ حاصل کرکے لوگوں کو حیران کردیاہے، جب کہ کانگریس کے امیدوار عبدالرزاق ملا نے تقریباً 9,500 ووٹ حاصل کیے۔

سیاسی تجزیہ کاروں کا ماننا ہے کہ ترنمول کانگریس کے کمزور ہونے سے ریاست کی اپوزیشن کی سیاست میں نئے امکانات پیدا ہو سکتے ہیں۔

یہاں اسمبلی انتخابات کے دوران کئی پولنگ اسٹیشنوں پر ای وی ایم پر پرفیوم، سیاہی اور ٹیپ کے استعمال سمیت بے قاعدگیوں کے الزامات لگائے گئے تھے۔ جس کے بعد الیکشن کمیشن نے الیکشن منسوخ کرکے دوبارہ پولنگ کرانے کا فیصلہ کیا۔

اس دوران جہانگیر خان اور اتر پردیش کے سینئر پولیس افسر اجے پال شرما کے درمیان کشیدگی کے چرچے بھی سیاسی حلقوں میں سرخیوں میں رہے۔

ریاست میں اقتدار کی تبدیلی کے بعد فلتا میں ترنمول کانگریس کی تنظیمی سرگرمیاں عملی طور پر ٹھپ ہوگئیں۔ بی جے پی نے مقامی لوگوں میں ووٹنگ کی دیرینہ کمی اور انتخابی مسئلہ کے طور پر تھریٹ کلچر کے الزامات کا فائدہ اٹھایا۔

وزیراعلیٰ شبھیندو ادھیکاری نے کئی عوامی میٹنگز اور روڈ شوز کا انعقاد کیا، جس میں بڑی تعداد میں لوگ جمع ہوئے۔ انہوں نے پفلتاکے لیے خصوصی ترقیاتی پیکج کا بھی اعلان کیا، جس کی گونج ووٹروں میں محسوس کی گئی۔

انتخابی نتائج کے بعد، شبیندو ادھیکاری نے سوشل میڈیا پر ایک لمبا پیغام جاری کرتے ہوئے کہا، فلتا کے لوگوں نے جمہوریت کو دوبارہ قائم کیا ہے۔ میں یہاں کے ووٹروں کو سلام کرتا ہوں جنہوں نے بی جے پی امیدوار کو 100,000 سے زیادہ ووٹوں کے فرق سے جتایا۔ ہم اس اعتماد کو ترقی کے ذریعے برقرار رکھنے کی کوشش کریں گے۔

انہوں نے ترنمول کانگریس پر سرکاری مشینری کا غلط استعمال کرنے، سنڈیکیٹ راج میں ملوث ہونے اور خوف کی سیاست کرنے کا الزام لگایا۔ انہوں نے جہانگیر خان کا نام لیے بغیر کہا کہ ایک نام نہاد کمانڈر نے جمہوریت کا گلا گھونٹنے میں کوئی کسر نہیں چھوڑی۔

وزیراعلیٰ نے دعویٰ کیا کہ 15 سال بعد عوام کو آزادی سے ووٹ ڈالنے کا موقع ملا اور حقیقی عوامی رائے سامنے آئی۔

سیاسی حلقے اس جیت کو مغربی بنگال میں بدلتی ہوئی سیاست کی علامت سے تعبیر کر رہے ہیں۔ بی جے پی اسے ایک بڑے مینڈیٹ کے طور پر پیش کر رہی ہے، جب کہ ترنمول کانگریس کو اپنی تنظیمی گرفت کو برقرار رکھنے کا چیلنج درپیش ہے۔

قابل ذکر ہے کہ جہاں ٹی ایم سی کو کراری شکست کا سامنا کرنا پڑا وہ ڈائمنڈ ہاربر لوک سبھا سیٹ کے تحت آتا ہے، جہاں سے سابق وزیر اعلیٰ ممتا بنرجی کے بھتیجے ابھیشیک بنرجی ترنمول کانگریس کے قومی جنرل سکریٹری اور لوک سبھا کے رکن پارلیمنٹ ہیں۔

---------------

ہندوستان سماچار / عبدالسلام صدیقی