علی گڑھ, 22 مئی (ہ س)۔

علی گڑھم میں شدید لو کے باعث لوگ گھروں میں قید ہوگئے ہیں

۔ محکمہ موسمیات کے مطابق 28 ؍مئی تک گرم ہوائیں چلنے کا امکان ہے، ایڈوائزری جاری کر دی گئی ہے۔

جمعہ کو بھی شہر میں سورج کی تپش اپنے عروج پررہی ۔ پچھلے کئی دنوں سے صبح ہوتے ہی گرم لو چلنا شروع ہو جاتی ہے اور پورا دن لوگوں کو جھلساتی رہتی ہے۔ شدید دھوپ اور گرمی سے لوگ گھروں سے کم ہی نکل رہے ہیں۔ جو شخص ایک بار کسی سایہ دار جگہ رک جاتا ہے، اس کا دوبارہ دھوپ میں جانے کا دل نہیں کرتا۔

ماہرین اور انتظامیہ کی جانب سے عوام کو مشورہ دیا جا رہا ہے کہ دوپہر 11؍ بجے سے4 ؍ بجے تک غیر ضروری طور پر گھر سے باہر نہ نکلیں۔ اگر بہت ضروری کام ہو تبھی باہر جائیں۔

محکمہ موسمیات کے مطابق28 ؍مئی تک لو چلنے کا امکان ہے۔ اگرچہ لوگ اندازہ لگا رہے ہیں کہ درجہ حرارت 45؍ ڈگری سیلسیس تک پہنچ رہا ہے، لیکن مسلسل ہوا چلنے کی وجہ سے درجہ حرارت زیادہ اوپر نہیں جا پا رہا۔ صبح سے ہی گرم ہوائیں چلنا شروع ہو جاتی ہیں اور رات کے وقت کچھ راحت محسوس ہوتی ہے۔ رات 12 ؍بجے کے بعد موسم میں ہلکی ٹھنڈک آتی ہے، مگر سورج نکلتے ہی پھر گرمی بڑھنے لگتی ہے۔

شدید گرمی کا سب سے زیادہ اثر بچوں، بزرگوں اور باہر کام کرنے والے افراد پر پڑ رہا ہے۔ مائیں اپنے بچوں کے سروں کو کپڑے سے ڈھانپ کر اور بار بار پانی پلا کر انہیں گرمی سے بچانے کی کوشش کر رہی ہیں۔ دو پہیہ گاڑیوں پر سفر کرنے والے لوگ چہرہ اور سر مکمل طور پر ڈھانپ کر نکل رہے ہیں۔ بہت سے افراد ماسک، دستانے اور دھوپ کے چشمے استعمال کرتے نظر آ رہے ہیں تاکہ گرم ہوا اور تیز دھوپ سے محفوظ رہ سکیں۔بازاروں میں ٹھنڈے مشروبات، شربت، آئس کریم اور دیگر ٹھنڈی اشیاء کی مانگ میں بھی کافی اضافہ ہو گیا ہے۔ گھروں، دفاتر اور دکانوں میں کولر، اے سی مسلسل چل رہے ہیں۔ بجلی کی کھپت میں بھی اضافہ دیکھا جا رہا ہے۔ دوپہر کے وقت سڑکوں اور بازاروں میں معمول کے مقابلے میں کم بھیڑ نظر آ رہی ہے کیونکہ لوگ گرمی سے بچنے کے لیے گھروں میں رہنا زیادہ پسند کر رہے ہیں۔

انتظامیہ نے عوام سے اپیل کی ہے کہ وہ دوپہر 11 ؍بجے سے 4 ؍بجے کے درمیان بلا ضرورت گھروں سے باہر نہ نکلیں۔ تیز دھوپ اور گرم ہوا سے بچنے کے لیے خصوصی احتیاط برتنے کی ہدایت دی گئی ہے۔

---------------

ہندوستان سماچار / سید کامران علی گڑھ