رائے گڑھ ، 21 مئی (ہ س) ٹرانسپورٹ محکمہ کی جانب سے گاڑیوں پر ہائی سکیورٹی رجسٹریشن نمبر پلیٹ (ایچ ایس آر پی) لگانے کے لیے دی گئی مدت میں شہریوں کی سہولت کے پیش نظر 30 جون 2026 تک توسیع کر دی گئی ہے۔ یہ اطلاع اسسٹنٹ ریجنل ٹرانسپورٹ آفیسر پنویل نلیش دھوٹے نے دی۔ انہوں نے بتایا کہ ممبئی ٹرانسپورٹ کمشنر دفتر کے 14 اگست 2025 کے سرکولر کے مطابق یہ مدت بڑھائی گئی ہے، جس کا تمام گاڑی مالکان نوٹس لیں۔

محکمہ کے مطابق گاڑیوں پر ہائی سکیورٹی نمبر پلیٹ لگانا قومی سلامتی کے نقطۂ نظر سے انتہائی ضروری ہے۔ گاڑیوں کے ذریعے ہونے والے جرائم پر قابو پانے، گاڑیوں کی درست شناخت ممکن بنانے اور نمبر پلیٹ میں چھیڑ چھاڑ یا جعلسازی روکنے کے لیے سپریم کورٹ نے اس بارے میں ہدایات جاری کی تھیں۔ اسی کے تحت یکم اپریل 2019 سے قبل تیار کی گئی تمام رجسٹرڈ گاڑیوں پر ایچ ایس آر پی لگانا لازمی قرار دیا گیا ہے۔

جن گاڑی مالکان کی گاڑیاں یکم اپریل 2019 سے پہلے تیار ہوئی ہیں، انہیں ٹرانسپورٹ محکمہ کی ویب سائٹ transport.maharashtra.gov.in پر جا کر رجسٹریشن کرانے کی ہدایت دی گئی ہے۔ محکمہ نے اس کام کے لیے مجاز کمپنیوں کی تقرری کی ہے اور انہی کے ذریعے ہائی سکیورٹی نمبر پلیٹ لگوانا لازمی ہوگا۔ محکمہ نے واضح کیا کہ غیر مجاز فروخت کنندگان سے لگائی گئی نمبر پلیٹوں کا اندراج مرکزی حکومت کے ڈیٹا بیس میں نہیں ہوگا۔

کسی بھی شکایت یا معلومات کے لیے شہری ٹرانسپورٹ محکمہ کے پورٹل یا dytccomp.tpt-mh@gov.in پر رابطہ کر سکتے ہیں۔ شہریوں کی سہولت کے لیے محکمہ نے یہ بھی اعلان کیا ہے کہ اگر ایک ہی مقام پر کم از کم 25 یا اس سے زیادہ دو پہیہ، چار پہیہ، آٹو رکشا، ٹیکسی، بس یا ٹرک مالکان ایچ ایس آر پی کے لیے درخواست دیں تو متعلقہ ایجنسی ان کی رہائشی سوسائٹی یا طے شدہ مقام پر بغیر کسی اضافی ہوم فٹنگ فیس کے نمبر پلیٹ نصب کرے گی۔

ہندوستھان سماچار

--------------------

ہندوستان سماچار / جاوید این اے