جموں، 21 مئی (ہ س)۔ جموں و کشمیر کے لیفٹیننٹ گورنر منوج سنہا کی جانب سے جاری 100 روزہ نشہ مُکت مہم کے تحت کٹھوعہ شہر کے وارڈ نمبر 14 میں ایک مبینہ منشیات فروش کے خلاف بڑی کارروائی عمل میں لائی گئی۔ اطلاعات کے مطابق کٹھوعہ انتظامیہ اور پولیس کی مشترکہ ٹیم نے مبینہ منشیات اسمگلر ہرپال سنگھ عرف بلوچی کے مکان کو سیل کرنے کی کارروائی انجام دی۔

ذرائع کا کہنا ہے کہ ملزم ماضی میں بھی منشیات اسمگلنگ کے متعدد مقدمات میں گرفتار ہو چکا ہے اور اسے مختلف معاملات میں سزا بھی سنائی جا چکی ہے۔ حکام کے مطابق ہرپال سنگھ اس وقت کوٹ بھلوال جیل میں بند ہے جبکہ اس کے خلاف این ڈی پی ایس ایکٹ کے تحت کئی مقدمات درج ہیں۔

انتظامیہ کا کہنا ہے کہ جموں و کشمیر میں منشیات کے خلاف جاری مہم کے تحت منشیات فروشوں اور اسمگلروں کے خلاف سخت کارروائیاں آئندہ بھی جاری رہیں گی تاکہ نوجوان نسل کو منشیات کے ناسور سے محفوظ رکھا جا سکے۔

ہندوستھان سماچار

---------------

ہندوستان سماچار / محمد اصغر