’’رعایت کا مطلب صلاحیت نہیں‘‘، طلبہ تنظیموں کا اعتراضرائے گڑھ، 20 مئی (ہ س) ریاستی کابینہ کے نئے فیصلے کے بعد مسابقتی امتحانات کی تیاری کرنے والے لاکھوں پسماندہ طبقے کے طلبہ میں شدید ناراضی پھیل گئی ہے۔ عام انتظامیہ محکمہ کی جانب سے لیے گئے فیصلے کے مطابق اگر ریزرو زمرے کے امیدوار عمر کی حد، تعلیمی اہلیت، تجربہ یا امتحان کے مواقع میں کسی بھی قسم کی سرکاری رعایت حاصل کرتے ہیں تو انہیں اب اوپن زمرے کی آسامیوں پر دعویٰ کرنے کی اجازت نہیں ہوگی۔

اس فیصلے کے بعد میرٹ کی بنیاد پر اوپن زمرے میں جگہ حاصل کرنے والے طلبہ کے لیے راستے بند ہونے کا امکان ظاہر کیا جا رہا ہے۔فیصلے کے مطابق درج فہرست ذات، درج فہرست قبائل، دیگر پسماندہ طبقات اور دیگر محفوظ زمروں کے امیدوار اگر کسی بھی قسم کی سرکاری رعایت حاصل کرتے ہیں تو ان کا انتخاب صرف متعلقہ محفوظ زمرے سے ہی کیا جائے گا۔یہاں تک کہ اگر امیدوار اوپن زمرے کے کٹ آف سے زیادہ نمبر حاصل کرے تب بھی اسے اوپن زمرے کی نشست پر منتخب نہیں کیا جائے گا۔طلبہ تنظیموں نے اس فیصلے کو صلاحیت اور میرٹ کی توہین قرار دیا ہے۔

سماجی تنظیموں کا کہنا ہے کہ اوپن زمرہ تمام طبقات کے لیے مساوی مواقع فراہم کرنے والا ہونا چاہیے، لیکن اس فیصلے سے اوپن نشستوں پر بالواسطہ طور پر غیر محفوظ طبقے کی اجارہ داری قائم ہو جائے گی۔تنظیموں کے مطابق اگر کسی باصلاحیت پسماندہ طبقے کے امیدوار کا انتخاب اوپن زمرے سے ہوتا ہے تو محفوظ نشست کسی دوسرے ضرورت مند امیدوار کو ملنے کا موقع پیدا ہوتا ہے، مگر اب باصلاحیت امیدواروں کو بھی صرف محفوظ نشستوں تک محدود رہنا پڑے گا، جس سے دیگر پسماندہ طلبہ کے مواقع کم ہونے کا خدشہ پیدا ہو گیا ہے۔

اندیشہ ظاہر کیا جا رہا ہے کہ اس فیصلے کا اثر آئندہ براہِ راست بھرتیوں، اساتذہ بھرتی اور ایم پی ایس سی امتحانات کے امیدواروں پر پڑ سکتا ہے۔دیہی اور معاشی طور پر کمزور طلبہ کے لیے مسابقت مزید دشوار ہونے کی تشویش ظاہر کی جا رہی ہے، جبکہ ریاست بھر میں اس فیصلے کے خلاف احتجاج شروع ہو گیا ہے۔ مختلف سماجی اور طلبہ تنظیموں نے حکومت سے یہ فیصلہ فوری واپس لینے کا مطالبہ کیا ہے۔

ہندوستھان سماچار

--------------------

ہندوستان سماچار / جاوید این اے