نئی دہلی، 20 مئی (ہ س)۔ دہلی کی وزیرِاعلیٰ ریکھا گپتا نے بدھ کے روز ’’ٹیلنٹ ہنٹ اسکیم - حوصلوں کی اڑان 2026-27‘‘ کا اعلان کیا۔ اس موقع پر وزیرِاعلیٰ نے کہا کہ یہ پہل دہلی کے نوجوانوں کی صلاحیتوں کو پہچاننے، نکھارنے اور قومی سطح تک پہنچانے کے لیے ایک مضبوط پلیٹ فارم ثابت ہوگی۔

جن سیوا سدن میں منعقدہ پریس کانفرنس کے دوران وزیرِاعلیٰ نے اس اہم اسکیم کے سرکاری لوگو کی بھی رونمائی کی۔ انہوں نے کہا کہ یہ لوگو دہلی کے نوجوانوں کے خوابوں، تخلیقی صلاحیتوں اور بلند حوصلے کی علامت ہے۔ اس موقع پر دہلی حکومت کے فن، ثقافت اور زبان کے وزیر کپل مشرا بھی موجود تھے۔

وزیرِاعلیٰ نے بتایا کہ اس اسکیم کا مقصد صرف صلاحیتوں کی تلاش نہیں بلکہ دہلی کے نوجوانوں کے لیے ایسا پلیٹ فارم تیار کرنا ہے جو آسانی، شمولیت، تنوع اور باصلاحیت نوجوانوں کے لیے خود روزگار اور خود انحصاری کے مواقع کو فروغ دے۔

وزیرِاعلیٰ نے کہا کہ یہ پہل مختلف سماجی اور معاشی پس منظر سے تعلق رکھنے والے نوجوانوں کو مساوی مواقع فراہم کرتے ہوئے ان کی تخلیقی صلاحیتوں کو نئی سمت دے گی۔

انہوں نے کہا کہ یہ اسکیم دہلی کی تمام 70 اسمبلی حلقوں میں نافذ کی جائے گی۔ اسکیم کے لیے 10 کروڑ روپے کا بجٹ مختص کیا گیا ہے۔ اس کے تحت تقریباً 25 ہزار سے زائد نوجوانوں کو مختلف مراحل میں حصہ لینے کا موقع ملے گا۔

پوری کارروائی کو شفاف، منظم اور مرحلہ وار طریقے سے انجام دیا جائے گا تاکہ ہر شریک کو برابر کا موقع مل سکے۔

16 سے 35 سال تک کے نوجوان اس اسکیم کے تحت بدھ سے www.delhitalenthunt.com کے مخصوص آن لائن پورٹل کے ذریعے بالکل مفت رجسٹریشن کر سکیں گے۔ اسی پورٹل پر رجسٹریشن، پروگرام کی معلومات اور تازہ اپڈیٹس بھی باقاعدگی سے دستیاب ہوں گی۔

ہندوستھان سماچار

---------------

ہندوستان سماچار / عبدالواحد