جموں, 15 مئی (ہ س)ضلع ڈوڈہ کے بھدرواہ قصبے میں دودھ میں ملاوٹ کے خلاف بڑی کارروائی کرتے ہوئے میونسپل کمیٹی بھدرواہ اور فوڈ سیفٹی محکمہ کی مشترکہ ٹیم نے تقریباً 100 کلوگرام ملاوٹی دودھ ضبط کرکے تلف کر دیا۔

یہ کارروائی سوشل میڈیا پر دودھ میں ملاوٹ کی ویڈیو وائرل ہونے کے بعد عمل میں لائی گئی، جس کے بعد متعلقہ حکام نے فوری طور پر علاقے میں معائنہ مہم شروع کی۔مشترکہ ٹیموں نے مختلف دودھ فروشوں کی جانچ کے دوران قریب 100 کلوگرام ایسا دودھ ضبط کیا جو انسانی صحت کے لیے مضر قرار دیا گیا۔ بعد ازاں ضبط شدہ دودھ کو موقع پر ہی تلف کر دیا گیا۔ایگزیکٹو آفیسر میونسپل کمیٹی بھدرواہ روی سینی نے کہا کہ یہ مہم عوامی صحت کے تحفظ اور شہریوں کو محفوظ و معیاری غذائی اشیاء کی فراہمی یقینی بنانے کے لیے چلائی گئی۔انہوں نے دکانداروں اور فروشوں کو خبردار کرتے ہوئے کہا کہ ملاوٹی اشیاء فروخت کرنے والوں کے خلاف سخت کارروائی کی جائے گی اور فوڈ سیفٹی قوانین کی خلاف ورزی کسی صورت برداشت نہیں کی جائے گی۔فوڈ سیفٹی محکمہ کے حکام نے بتایا کہ خوراک میں ملاوٹ روکنے اور بازار میں معیار برقرار رکھنے کے لیے آئندہ دنوں میں بھی اسی طرح کی کارروائیاں جاری رہیں گی۔مقامی لوگوں نے اس اقدام کا خیر مقدم کرتے ہوئے مطالبہ کیا کہ ملاوٹی اشیاء کی فروخت روکنے کے لیے باقاعدہ معائنہ مہمات جاری رکھی جائیں۔

ہندوستھان سماچار

---------------

ہندوستان سماچار / محمد اصغر