شی جن پنگ نے ٹرمپ کو چین کے قدیم فلسفے ’تمام جانداروں کے درمیان ہم آہنگی‘ کے تصور کو سمجھایا

بیجنگ، 15 مئی (ہ س)۔ چین کی وزارتِ خارجہ کی ترجمان ماو ننگ نے دارالحکومت بیجنگ کے ’’ٹیمپل آف ہیون‘‘ میں ’’ہال آف پریئر فار گڈ ہارویسٹس‘‘ کے دورے کے دوران صدر شی جن پنگ، امریکی صدر ڈونلڈ ٹرمپ اور دیگر کی تصویر آج صبح پوسٹ کی ہے۔ انہوں نے لکھا، ’’صدر شی جن پنگ نے ٹرمپ اور ان کے خاندان کو تمام جانداروں کے درمیان ہم آہنگی کے تصور اور قدرت کے قوانین کے احترام کے بارے میں سمجھایا۔‘‘ ٹرمپ اس وقت چین کے سرکاری دورے کے تیسرے دن بیجنگ میں ہیں۔ ٹرمپ اور ان کے خاندان نے ’’ٹیمپل آف ہیون‘‘ کا دورہ جمعرات کو کیا تھا۔

وزارتِ خارجہ کی ترجمان ماو ننگ نے دوسری پوسٹ میں لکھا کہ شی مانتے ہیں کہ چین اور امریکہ دونوں ہی ملکوں کے لوگ عظیم ہیں۔ چین کا عظیم احیاء اور امریکہ کو پھر سے عظیم بنانا، یہ دونوں کام ساتھ ساتھ چل سکتے ہیں۔ چین اور امریکہ ایک دوسرے کو کامیاب ہونے میں مدد اور دنیا کی بھلائی کر سکتے ہیں۔ ننگ کہتی ہیں کہ چین-امریکہ تعلقات دونوں ملکوں کے 1.7 ارب سے زائد لوگوں کی بھلائی سے مربوط ہیں اور دنیا کے آٹھ ارب سے زائد لوگوں کے مفادات کو متاثر کرتے ہیں۔

بیجنگ کے تاریخی ٹیمپل آف ہیون میں ٹرمپ کے ساتھ پہنچے شی جن پنگ نے قدرتی قوانین کے احترام اور فطرت کے ساتھ تال میل بٹھا کر رہنے کی اہمیت پر زور دیا۔ یہ تصور چینی عالمی نقطۂ نظر کا حصہ ہے۔ یہ ’’آسمان اور انسانیت کے درمیان ہم آہنگی‘‘ کی عکاسی کرتا ہے۔ ماو ننگ کا کہنا ہے کہ اس فلسفے کو سمجھانے کا مقصد تعاون کا جذبہ رہا۔

’’تمام جانداروں کے درمیان ہم آہنگی‘‘ کے تصور کو ’’انسان اور فطرت کے درمیان ہم آہنگ بقائے باہمی‘‘ کے طور پر بھی جانا جاتا ہے۔ اس قدیم فلسفیانہ خیال کو جدید چین نے اپنی ماحولیاتی تہذیب کی بنیاد کے طور پر اپنایا ہے۔ یہ تصور خاص طور پر تاو ازم اور کنفیوشس ازم سے متاثر ہے۔ اس کے تحت مانا جاتا ہے کہ انسان فطرت سے الگ نہیں، بلکہ اس کا حصہ ہے۔ انسان کو فطرت کا احترام کرنا چاہیے، اس کے قوانین کی پیروی کرنی چاہیے اور اس کی حفاظت کرنی چاہیے۔

ہندوستھان سماچار

---------------

ہندوستان سماچار / انظر حسن