جموں، 15 مئی (ہ س)۔
جموں زون پولیس کے آئی جی بھیم سین توتی نے ضلع پولیس لائنز جموں میں ایک اعلیٰ سطحی جراٰئم جائزہ میٹنگ کی صدارت کی، جس میں ضلع کی موجودہ سیکورٹی صورتحال اور زیر التوا مقدمات کی تحقیقات کا تفصیلی جائزہ لیا گیا۔میٹنگ میں ضلع کے تمام سپرنٹنڈنٹ آف پولیس، سب ڈویژنل پولیس افسران (ایس ڈی پی اوز) اور اسٹیشن ہاؤس آفیسرز (ایس ایچ اوز) نے شرکت کی۔اجلاس کے دوران آئی جی پی جموں نے افسران کو ہدایت دی کہ وہ فیلڈ پولیسنگ میں پیشہ ورانہ ذمہ داری کا مظاہرہ کرتے ہوئے قانون نافذ کرنے اور تفتیشی عمل میں نتیجہ خیز حکمت عملی اپنائیں۔ انہوں نے معیاری تحقیقات اور مضبوط شواہد اکٹھا کرنے کی اہمیت پر زور دیتے ہوئے کہا کہ اس سے عدالتوں میں سزا کی شرح بہتر ہوگی۔
منشیات کے خلاف زیرو ٹالرنس پالیسی کو دہراتے ہوئے انہوں نے پولیس افسران کو منشیات فروش نیٹ ورکس کے خلاف کارروائیاں مزید تیز کرنے اور عادی مجرموں کی جائیدادیں ضبط کرنے کے اقدامات کرنے کی ہدایت دی۔آئی جی پی جموں نے جرائم کی روک تھام اور امن و قانون کی صورتحال برقرار رکھنے کے لیے گشت میں اضافہ اور انٹیلی جنس نظام کو مزید مضبوط بنانے پر بھی زور دیا۔ میٹنگ کے اختتام پر بھیم سین توتی نے افسران کو دیانتداری اور عوام دوست رویہ اختیار کرتے ہوئے عوامی شکایات کے مؤثر ازالے کی ہدایت دی۔
ہندوستھان سماچار
ہندوستان سماچار / محمد اصغر
