ادھم پور پولیس نے سوشل میڈیا پیج کے خلاف مقدمہ درج کیا

جموں، 15 مئی (ہ س)۔ جموں و کشمیر پولیس نے ضلع ادھم پور کے ایک حساس معاملے سے متعلق مبینہ طور پر اشتعال انگیز اور بھڑکاؤ مواد سوشل میڈیا پر پھیلانے کے الزام میں ایک سوشل میڈیا پیج کے خلاف ایف آئی آر درج کر لی ہے۔ پولیس حکام کے مطابق انسٹاگرام پر موجود ادھم پور آواز نامی سوشل میڈیا پیج کے ذریعے ایسی ویڈیوز اور مواد اپ لوڈ اور شیئر کیا گیا، جس سے عوامی امن، فرقہ وارانہ ہم آہنگی اور قانون و انتظام کی صورتحال متاثر ہونے کا خدشہ پیدا ہو گیا تھا۔

حکام نے بتایا کہ معاملے میں بی این ایس کی متعلقہ دفعات کے تحت مقدمہ درج کرکے تحقیقات کا آغاز کر دیا گیا ہے۔ پولیس کے مطابق مذکورہ مواد اُس ایڈوائزری کے باوجود گردش میں پایا گیا جو پہلے ہی ادھم پور پولیس کی جانب سے جاری کی گئی تھی۔ ایڈوائزری میں عوام کو غیر مصدقہ، گمراہ کن اور اشتعال انگیز مواد سوشل میڈیا پر شیئر یا فارورڈ کرنے سے خبردار کیا گیا تھا۔

پولیس نے ایک بار پھر عوام اور سوشل میڈیا پلیٹ فارمز سے اپیل کی ہے کہ افواہوں سے گریز کریں اور صرف سرکاری و مصدقہ معلومات پر ہی اعتماد کریں۔

ہندوستھان سماچار

---------------

ہندوستان سماچار / محمد اصغر