لاکھ ’جلتارا‘ تعمیر کرنے کا ہدف ، تالابوں، نالوں اور کنوؤں کی بحالی سے مثبت نتائج ظاہرعثمان آباد ، 15 مئی (ہ س)۔ عثمان آباد کی سرزمین کے لیے خشک سالی کوئی نئی بات نہیں۔ جیسے ہی گرمیوں کی آمد ہوتی ہے، دیہاتوں کے کنوؤں کی تہہ دکھائی دینے لگتی ہے، بورویل خشک پڑ جاتے ہیں، ٹینکر کے پانی کے لیے قطاریں لگ جاتی ہیں اور کسانوں کی آنکھوں میں ایک بار پھر فکر و تشویش کے بادل منڈلانے لگتے ہیں۔ آسمان پر بادل چھا جانے کے باوجود بارش یقینی طور پر ہوگی، اس کی ضمانت باقی نہیں رہی۔ بدلتے موسمی حالات، غیر منظم بارش اور مسلسل گرتی ہوئی زیر زمین پانی کی سطح کے باعث عثمان آباد جیسے خشک سالی سے متاثرہ ضلع کے سامنے آبی بحران دن بہ دن سنگین شکل اختیار کرتا جا رہا ہے۔

ایسے حالات میں “جلتارا مہم” صرف سرکاری مہم نہیں رہی بلکہ امید کی ایک نئی کرن بن کر ابھر رہی ہے۔یہ مہم محض پانی روکنے تک محدود نہیں بلکہ مستقبل بچانے کی ایک اجتماعی کوشش بن چکی ہے، جو آنے والی نسلوں کے وجود اور بقا کے لیے شروع کی گئی ہے۔ پانی صرف پیاس بجھانے کا ذریعہ نہیں بلکہ زراعت کی زندگی، مویشیوں کا سہارا، دیہی معیشت کی ریڑھ کی ہڈی اور ماحولیات کی سانس ہے۔

اسی لیے “پانی روکو، پانی جذب کرو” کا تصور اب صرف نعروں تک محدود نہیں رہا بلکہ اسے عملی شکل دینے کا وقت آ چکا ہے۔ عثمان آباد ضلع میں “جلتارا مہم” کے ذریعے یہی شعور عوام کے دلوں میں راسخ ہوتا دکھائی دے رہا ہے۔ دیہاتوں میں تالابوں، نالوں، چھوٹے آبی ذخائر، کنوؤں اور کھیتوں کے تالابوں کی بحالی کے لیے عوامی تعاون سے بڑے پیمانے پر کام جاری ہے۔

گال نکالنے، نالوں کی گہرائی بڑھانے، بندھ باندھنے، شجرکاری، آبی ذخائر کی صفائی اور زیر زمین پانی کی سطح بڑھانے جیسے اقدامات کے نتیجے میں کئی دیہاتوں میں مثبت تبدیلیاں محسوس کی جا رہی ہیں۔ جو کنویں چند برس قبل اپریل کے مہینے میں ہی خشک ہو جاتے تھے، وہ اب زیادہ عرصے تک پانی سے بھرے رہنے لگے ہیں، جبکہ بعض علاقوں میں زیر زمین پانی کی سطح میں اضافہ بھی دیکھا جا رہا ہے۔

اس مہم کی ایک اہم خصوصیت یہ ہے کہ اس نے خشک سالی کو دیکھنے کا نظریہ بدل دیا ہے۔ پہلے پانی کی قلت پیدا ہونے پر صرف حکومت سے مدد کی توقع کی جاتی تھی، مگر اب دیہات کے لوگ خود آگے بڑھ کر آبی تحفظ کے کاموں میں حصہ لینے لگے ہیں۔ نوجوانوں کی رضاکارانہ محنت، خواتین سیلف ہیلپ گروپس کی شرکت، کسانوں کی منصوبہ بندی اور سماجی تنظیموں کے تعاون سے “جلتارا” اب عوامی تحریک بنتی جا رہی ہے۔

عثمان آباد جیسے ضلع کے لیے زیر زمین پانی کی سطح بڑھانا وقت کی سب سے بڑی ضرورت بن چکی ہے، کیونکہ یہاں زراعت اور پینے کے پانی کا زیادہ تر انحصار زیر زمین پانی پر ہی ہے۔ بارش کا پانی زمین میں جذب ہوگا تو ہی کنویں اور بورویل زندہ رہ سکیں گے۔ اسی لیے بارش کے ہر قطرے کو روکنا اور زمین میں جذب کرنا اب محض انتخاب نہیں بلکہ ناگزیر ضرورت بن چکا ہے۔ اس مہم کو مزید طاقت انتظامیہ، عوامی شراکت داری اور سماجی تنظیموں کے مشترکہ تعاون سے حاصل ہو رہی ہے۔

ضلع کلکٹر کیرتی کرن پجار نے ضلع کے سامنے “ایک لاکھ جلتارا” تیار کرنے کا بلند ہدف رکھا ہے۔ ہر کسان پروڈیوسر کمپنی اور کسان گروپ کو 500 آبی تحفظ منصوبے مکمل کرنے کا ہدف دیا گیا ہے، جبکہ دیہاتوں میں وسیع پیمانے پر بیداری مہم چلانے کی اپیل بھی کی گئی ہے۔ اس مہم میں “نام فاؤنڈیشن” سمیت مختلف سماجی ادارے فعال طور پر شریک ہیں۔ نام فاؤنڈیشن کی جانب سے آبی تحفظ کے کاموں کے لیے ضروری مشینری فراہم کی جا رہی ہے۔

اس کے باعث آبی تحفظ کے منصوبوں کو رفتار مل رہی ہے اور امید ظاہر کی جا رہی ہے کہ مستقبل میں ضلع کی زیر زمین پانی کی سطح میں نمایاں اضافہ ہوگا، جس کا براہ راست فائدہ کسانوں کو زراعت اور شہریوں کو پینے کے پانی کی صورت میں حاصل ہوگا۔ آج بھی کئی کسان پانی کی کمی کے باعث فصلوں کے نقصان کا سامنا کر رہے ہیں، جبکہ مویشیوں کے لیے چارہ اور پانی کا مسئلہ بھی سنگین بنتا جا رہا ہے۔

ایسے حالات میں آبی تحفظ کا ہر اقدام مستقبل کے بحران سے نمٹنے کی طاقت رکھتا ہے، کیونکہ جہاں پانی محفوظ رہتا ہے وہاں زراعت زندہ رہتی ہے، زراعت قائم رہے تو دیہی معیشت برقرار رہتی ہے اور گاؤں محفوظ رہیں تو مستقبل بھی محفوظ رہتا ہے۔ “اگر ہر قطرہ محفوظ رکھا جائے تو ہی کل چشمے بہہ سکیں گے، اور آبی تحفظ کے راستے پر چل کر ہی خوشحالی کا سورج طلوع ہوگا۔”

“جلتارا مہم” کی اصل طاقت وہ سماجی شعور ہے جو اس کے ذریعے پیدا ہو رہا ہے۔یہ مہم صرف آبی ذخائر کی مرمت تک محدود نہیں بلکہ پانی کے استعمال کے حوالے سے ذمہ داری کا شعور پیدا کر رہی ہے۔ گھریلو استعمال سے لے کر زراعت تک پانی کے درست استعمال، دوبارہ استعمال اور بچت کے حوالے سے معاشرے میں بیداری پیدا کی جا رہی ہے۔

اگر عثمان آباد کو خشک سالی سے پاک اور آبی وسائل سے مالا مال بنانا ہے تو “جلتارا” کو صرف سرکاری مہم نہیں بلکہ عوامی تحریک بنانا ہوگا۔ حکومت، انتظامیہ، سماجی تنظیمیں اور شہری اگر متحد ہو کر آگے بڑھیں تو خشک سالی پر قابو پانا ناممکن نہیں۔ کیونکہ آج محفوظ کیا گیا ہر قطرہ آنے والی نسلوں کا مستقبل محفوظ کرے گا، اور شاید انہی قطروں سے عثمان آباد کی نئی خوشحالی کی صبح طلوع ہوگی۔

ہندوستھان سماچار

--------------------

ہندوستان سماچار / جاوید این اے