جموں, 14 مئی (ہ س)۔ جموں و کشمیر اسمبلی میں اپوزیشن لیڈر سنیل کمار شرما کو اسمبلی کی دو اہم کمیٹیوں میں شامل کیا گیا ہے، جس سے ایوان میں بی جے پی کی اہم نمائندگی مزید مضبوط ہوئی ہے۔جموں و کشمیر قانون ساز اسمبلی سکریٹریٹ کی جانب سے جاری نوٹیفکیشن کے مطابق اسپیکر عبدالرحیم راتھر نے سال 2026-27 کے لیے مختلف اسمبلی کمیٹیوں کی تشکیل دی ہے۔

نوٹیفکیشن کے مطابق سنیل شرما کو جنرل پرپز کمیٹی کا رکن نامزد کیا گیا ہے، جو اسمبلی کے انتظامی اور طریقۂ کار سے متعلق معاملات پر اسپیکر کو مشورہ دینے والی اہم کمیٹی سمجھی جاتی ہے۔ اس کمیٹی میں مختلف سیاسی جماعتوں کے سینئر اراکین شامل ہیں۔اس کے علاوہ سنیل شرما کو رولز کمیٹی میں بھی شامل کیا گیا ہے، جو اسمبلی کے قواعد و ضوابط اور ایوانی کارروائی سے متعلق امور کا جائزہ لینے والی بااختیار کمیٹی ہے۔

رولز کمیٹی میں علی محمد ساگر، مبارک گل، جسٹس حسنین مسعودی، مظفر اقبال خان، ڈاکٹر نریندر سنگھ رینا، اروند گپتا اور سریندر کمار بھی شامل ہیں۔سیاسی مبصرین کے مطابق ان اہم کمیٹیوں میں اپوزیشن لیڈر کی شمولیت سے حزب اختلاف کو اسمبلی کی کارروائی، قانون سازی اور ادارہ جاتی فیصلوں میں مؤثر کردار حاصل ہوگا۔دریں اثنا اسمبلی سکریٹریٹ نے پبلک اکاؤنٹس کمیٹی، اسٹی میٹس کمیٹی، پبلک انڈرٹیکنگز کمیٹی، کمیٹی آن پرولیجز، پٹیشنز کمیٹی، ایتھکس کمیٹی، ماحولیات کمیٹی اور دیگر اہم کمیٹیوں کی بھی تشکیل دی ہے۔

ہندوستھان سماچار

---------------

ہندوستان سماچار / محمد اصغر