ایسٹن ولا کے خلاف محمد صلاح کی واپسی طے، چند منٹ ہی کھیل پائیں گے : آرنے سلاٹ

لندن، 14 مئی (ہ س)۔ لیور پول کے اسٹار فارورڈ محمد صلاح ایسٹن ولا کے خلاف پریمیئر لیگ میچ کے لیے ایکشن میں واپس آ سکتے ہیں۔ ہیڈ کوچ آرنے سلاٹ نے جمعرات کو تصدیق کی کہ محمد صلاح جمعہ کو ایسٹن ولا کے خلاف ہونے والے میچ کے لیے دستیاب ہوں گے، لیکن وہ صرف چند منٹ ہی کھیل پائیں گے۔ توقع ہے کہ وہ دوبارہ میدان میں اتریں گے۔

سلاٹ نے دوسرے کھلاڑیوں کی فٹنس کے بارے میں بھی اپ ڈیٹ فراہم کیا۔ انہوں نے کہا کہ گول کیپر ایلیسن بیکر نے ٹیم کے ساتھ دوبارہ ٹریننگ شروع کر دی ہے تاہم ان کی شرکت کا حتمی فیصلہ میچ سے قبل کیا جائے گا۔ فلورین ورٹز پیٹ کے انفیکشن میں مبتلا ہیں اور وہ اینٹی بائیوٹکس لے رہے ہیں۔ اپنے مستقبل کے بارے میں پوچھے جانے پر سلاٹ نے کہا، مجھے یقین ہے کہ میں اگلے سیزن میں لیورپول مینیجر کے طور پر رہوں گا۔ میرا کلب کے ساتھ معاہدہ ہے اور ان کے ساتھ ہماری بات چیت مثبت رہی ہے۔ جب آپ لیگ نہیں جیتتے ہیں تو تنقید فطری ہے اور ہمیں اسے قبول کرنا ہوگا۔

محمد صلاح گزشتہ ماہ کرسٹل پیلس کے خلاف ہیمسٹرنگ انجری کے باعث میدان سے باہر ہو گئے تھے۔ خدشات تھے کہ اس کا سیزن اور ممکنہ طور پر لیورپول میں اس کا کیریئر ختم ہو سکتا ہے، اس قیاس کے ساتھ کہ مصری اسٹار سیزن کے اختتام پر کلب چھوڑ سکتا ہے۔ تاہم بعد میں کلب نے واضح کیا کہ ان کی چوٹ اتنی سنگین نہیں تھی جتنا کہ ابتدا میں خدشہ تھا۔

لیورپول اور ایسٹن ولا 59 پوائنٹس کے ساتھ بالترتیب پریمیئر لیگ کی اسٹینڈنگ میں چوتھے اور پانچویں نمبر پر ہیں۔ اس میچ میں جیت لیورپول کو اگلے سیزن کی یوای ایف اے چیمپئنز لیگ میں جگہ بنانے کے لیے عملی طور پر یقینی بنا سکتی ہے۔ تاہم، لیورپول اس سیزن میں توقع کے مطابق کارکردگی دکھانے میں ناکام رہا ہے اور ٹیم کسی بھی بڑے ٹائٹل سے محروم رہی ہے۔ گزشتہ سیزن کی کامیابی کو دوہرانے میں ناکامی پر کوچ آرنے سلاٹ کے مستقبل کے بارے میں سوالات اٹھائے ہیں۔ لیور پول کا سیزن کا آخری لیگ میچ 24 مئی کو برینٹ فورڈ کے خلاف ہوگا۔

---------------

ہندوستان سماچار / عبدالسلام صدیقی