علی گڑھ, 14 مئی (ہ س)۔ اے ایم یو کے سر سید ہال (نارتھ) کی سالانہ میگزین ‘‘بابِ علم’’ کا اجراء پرو وائس چانسلر پروفیسر محمد محسن خان نے ہال انتظامیہ کے اراکین اور طلبہ کی ادارتی ٹیم کی موجودگی میں اپنے دفتر میں منعقدہ ایک پروقار تقریب میں کیا۔

پروفیسر محسن خان نے میگزین کے معیاری مواد اور خوبصورت ڈیزائن کی ستائش کی اور مدیرِ اعلیٰ راشد سلیم کو اس اشاعت کی تیاری میں ان کی محنت اور لگن پر مبارکباد پیش کی۔ انہوں نے کہا کہ اس طرح کی ادبی سرگرمیاں طلبہ میں مطالعہ اور تحریر کے رجحان کو فروغ دیتی ہیں۔

پرووسٹ ڈاکٹر محمد جہانگیر شبیر خان نے کہا کہ ‘‘بابِ علم’’ یونیورسٹی کی بھرپور اقامتی و ادبی ثقافت کی عکاس ہے۔ میگزین میں ہال کی اہم سرگرمیوں کا احاطہ کیا گیا ہے، اور یہ طلبہ کے تحریر کردہ مضامین، نظموں اور کہانیوں کے ذریعے تخلیقی اور فکری اظہار کا ایک مؤثر پلیٹ فارم ہے۔

مدیرِ اعلیٰ راشد سلیم نے پرو وائس چانسلر، ہال انتظامیہ اور ادارتی بورڈ کے اراکین کا ان کی حوصلہ افزائی اور تعاون پر شکریہ ادا کیا۔ اس موقع پر مسٹر نورالزماں ارشد (سینسر)، ڈاکٹر ظفر افتخار اور مسٹر محمد کامران خان (وارڈنز)، نیز ادارتی بورڈ کے اراکین عقیل احمد اور داؤد رشیدی موجود تھے۔

---------------

ہندوستان سماچار / سید کامران علی گڑھ