گوہاٹی، 14 مئی (ہ س)۔ کانگریس کے قومی ترجمان پون کھیڑا آسام کے وزیر اعلیٰ ڈاکٹر ہمنتا بسوا سرما کی اہلیہ رینیکی بھویاں سرما کے مبینہ متعدد غیر ملکی پاسپورٹ معاملے کی جاری تحقیقات کے سلسلے میں پوچھ گچھ کے لیے جمعرات کو مسلسل دوسرے دن آسام پولیس کرائم برانچ کے سامنے پیش ہوئے۔
ذرائع کے مطابق پون کھیڑا سے جمعرات کو میراتھن پوچھ گچھ ہوئی، جو تقریباً آٹھ گھنٹے تک جاری رہی۔ تاہم، اس نے کرائم برانچ کے دفتر میں داخل ہوتے وقت اور باہر نکلنے کے بعد میڈیا کے ذریعہ پوچھے گئے کسی بھی سوال کا جواب نہیں دیا۔ جب صحافیوں نے ان سے پوچھا کہ کیا وہ اب بھی اپنے سابقہ الزامات اور بیانات پر قائم ہیں تو وہ خاموش رہے۔
اطلاعات کے مطابق، کرائم برانچ نے پون کھیڑا کو مزید پوچھ گچھ کے لیے 25 مئی کو دوبارہ پیش ہونے کی ہدایت دی ہے۔ بدھ کے روز ان سے تقریباً 11 گھنٹے تک پوچھ گچھ کی گئی اور انہیں دیر رات جانے کی اجازت دی گئی۔
بدھ کی پوچھ گچھ کے بعد میڈیا سے بات کرتے ہوئے پون کھیڑا نے کہا تھا کہ انہیں عدلیہ پر پورا بھروسہ ہے اور وہ تحقیقات میں مکمل تعاون کریں گے۔
قابل ذکر ہے کہ یہ معاملہ گوہاٹی میں منعقدہ پریس کانفرنس کے دوران پون کھیڑا کی جانب سے لگائے گئے الزامات سے متعلق ہے۔ اس کے بعد رینیکی بھویاں شرما نے الزامات کو جھوٹا اور ہتک آمیز قرار دیتے ہوئے کرائم برانچ میں ایف آئی آر درج کرائی۔ پون کھیڑا نے بعدمیں پیشگی ضمانت کے لیے عدالت سے رجوع کیا۔
اس سے قبل سپریم کورٹ نے انہیں گوہاٹی ہائی کورٹ سے رجوع کرنے کو کہا تھا۔
اس کے بعد سپریم کورٹ نے انہیں کچھ شرطوں کے ساتھ ضمانت دینے کا حکم دیاتھاجس کے بعد وہ تفتیشی ایجنسیوں کے سامنے پوچھ گچھ کے لیے پیش ہو رہے ہیں۔
---------------
ہندوستان سماچار / عبدالسلام صدیقی
