شری امر ناتھ یاترا کے دوران خدمات کے لیے مقامی لوگوں کو ترجیحی دی جائے

جموں، 13 مئی (ہ س)۔ جموں و کشمیرکی شیو سینا یونٹ نے حکومت اور شری امرناتھ شرائن بورڈ سے مطالبہ کیا ہے کہ آنے والی شری امرناتھ یاترا سے متعلق تمام خدمات اور ٹھیکوں میں مقامی نوجوانوں، تاجروں اور چھوٹے کاروباری افراد کو ترجیح دی جائے۔ پارٹی کے جموں و کشمیر سربراہ منیش ساہنی نے میڈیا سے بات کرتے ہوئے کہا کہ امرناتھ یاترا جموں و کشمیر کی معیشت کے لیے ریڑھ کی ہڈی کی حیثیت رکھتی ہے کیونکہ ہزاروں خاندان سیاحت، ٹرانسپورٹ، ہوٹل، گھوڑا سروس، پٹھو، پالکی، ٹینٹ اور دیگر چھوٹے کاروباروں سے وابستہ ہیں۔انہوں نے کہا کہ آپریشن سندور کے بعد سیاحتی شعبے کو شدید نقصان پہنچا ہے اور ہوٹلوں، ٹیکسیوں، ہاؤس بوٹس، مقامی بازاروں اور چھوٹے تاجروں کا کاروبار بری طرح متاثر ہوا ہے۔ ایسے میں امرناتھ یاترا مقامی معیشت کی بحالی میں اہم کردار ادا کر سکتی ہے۔

منیش ساہنی نے مطالبہ کیا کہ یاترا سے متعلق ٹینڈرز، پرمٹس اور عارضی لائسنس جاری کرتے وقت مقامی افراد کو ترجیح دی جائے۔ انہوں نے کہا کہ گھوڑا سروس، پٹھو، پالکی، ٹینٹ، ٹرانسپورٹ اور کیمپوں کے ٹھیکے کسی ایک بڑے ٹھیکیدار یا بیرونی ایجنسی تک محدود نہ رہیں بلکہ انہیں شفاف انداز میں مقامی نوجوانوں اور چھوٹے کاروباری افراد میں تقسیم کیا جائے۔

انہوں نے مزید کہا کہ گزشتہ کئی برسوں سے مقامی تاجروں اور ٹھیکیداروں کی جانب سے شکایات سامنے آ رہی ہیں کہ بڑے ٹھیکے بیرونی یا بااثر افراد کو دیے جاتے ہیں جبکہ مقامی لوگوں کو نظر انداز کیا جاتا ہے۔ ان کا کہنا تھا کہ یاترا سے وابستہ معاشی مواقع پر پہلا حق مقامی لوگوں کا ہے۔ ساہنی نے کہا کہ دہشت گردی اور مشکل حالات کے دوران بھی مقامی لوگوں نے امرناتھ یاترا کے پُرامن انعقاد میں اہم کردار ادا کیا، اس لیے حکومت اور شرائن بورڈ کو ان کے مفادات کا تحفظ یقینی بنانا چاہیے۔انہوں نے یہ بھی مطالبہ کیا کہ جموں کو صرف یاتریوں کے لیے ٹرانزٹ پوائنٹ نہ سمجھا جائے بلکہ اسے ایک بڑے مذہبی اور سیاحتی مرکز کے طور پر فروغ دیا جائے تاکہ مقامی تجارت اور سیاحت کو فائدہ پہنچ سکے۔

اس دوران بابا برفانی کے مقدس برفانی لنگم کے جلد پگھلنے پر تشویش ظاہر کرتے ہوئے انہوں نے غار کے اندر ہجوم پر قابو پانے اور سائنسی بنیادوں پر انتظامات کرنے کی اپیل کی تاکہ مقدس برفانی لنگم یاترا کے دوران محفوظ رہے۔پارٹی نے لنگر تنظیموں کو درپیش گیس سپلائی کے مسئلے کو بھی اٹھاتے ہوئے انتظامیہ سے مطالبہ کیا کہ لنگر خدمات میں خلل نہ آنے دیا جائے اور گھریلو ایل پی جی سلنڈروں کے استعمال کے لیے خصوصی اجازت دی جائے۔

ہندوستھان سماچار

---------------

ہندوستان سماچار / محمد اصغر