وزرا اور اعلیٰ حکام اگلے چھ ماہ تک غیر ملکی سفر سے گریز کریں۔ ریاست میں تمام سطحوں پر ہائبرڈ میٹنگز، ڈیجیٹل ورک کلچر، اور گھر سے کام کرنے پر زور۔

وزیر اعلیٰ نے توسیعی کابینہ سے پہلی ملاقات کی، نئے وزرا سے اظہار تشکرکیا

لکھنو، 13 مئی (ہ س)۔ وزیراعلیٰ یوگی آدتیہ ناتھ نے ریاستی کابینہ کے ارکان پر زور دیا کہ وہ ہفتے میں کم از کم ایک بار پبلک ٹرانسپورٹ کا استعمال کریں۔ انہوں نے حکومت میں کفایت شعاری، توانائی کے تحفظ اور عوام دوست رویے کے نئے ورک کلچر کو فروغ دینے کی ضرورت کا اظہار کیا۔ انہوں نے وزراءپر زور دیا کہ وہ اپنی گاڑیوں کے بیڑے میں 50 فیصد کمی کریں۔ وزیر اعلیٰ نے ریاستی حکومت کے تمام وزراء اور سینئر عہدیداروں کو بھی ہدایت دی کہ وہ ناگزیر حالات کے علاوہ اگلے چھ ماہ تک غیر ملکی سفر سے گریز کریں۔

بدھ کو کابینہ میں توسیع کے بعد پہلی میٹنگ میں، وزیر اعلیٰ نے کئی اہم ہدایات جاری کیں جن کا مقصد طرز حکمرانی کو مزید ذمہ دار، نظم و ضبط اور وسائل کے حوالے سے حساس بنانا ہے۔ انہوں نے کہا کہ موجودہ عالمی صورتحال میں ایندھن کی بچت نہ صرف ایک معاشی ضرورت ہے بلکہ قومی ذمہ داری بھی ہے۔ پیٹرول اور ڈیزل کی کھپت کو کم سے کم کرنے کے وزیر اعظم نریندر مودی کی کال کا حوالہ دیتے ہوئے، وزیر اعلی نے کہا کہ اتر پردیش کابینہ کو خود ایک مثال قائم کرنی چاہیے۔

وزیر اعلیٰ نے کہا کہ وزراءمیٹرو، بس، ای رکشہ، کار پولنگ یا سائیکل جیسی سہولیات کو ہفتے میں ایک مقررہ دن استعمال کریں، تاکہ معاشرے میں ایک مثبت پیغام جائے اور عام لوگ بھی اس سے تحریک لیں۔ گورننس اور انتظامی کاموں میں ڈیجیٹل اور ورچوئل میڈیم کے زیادہ سے زیادہ استعمال پر زور دیتے ہوئے، انہوں نے ہدایت کی کہ جہاں تک ممکن ہو، بین الاضلاع اجلاس، تربیتی پروگرام اور قانون ساز اسمبلی اور قانون ساز کونسل کی اسٹینڈنگ کمیٹیوں کے اجلاسوں کا انعقاد ہائبرڈ موڈ میں کیا جائے۔

وزیراعلیٰ نے سیکرٹریٹ اور ڈائریکٹوریٹ کی سطح پر ضرورت کی بنیاد پر ایئر کنڈیشنرز اور ایلیویٹرز کے استعمال، اے سی کا درجہ حرارت 24 سے 26 ڈگری سینٹی گریڈ کے درمیان رکھنے اور قدرتی روشنی کے زیادہ سے زیادہ استعمال کی حوصلہ افزائی کرنے کی ہدایت کی۔ انہوں نے پبلک ٹرانسپورٹ، ریل سفر اور کار پولنگ کو فروغ دینے اور 50 سے زائد ملازمین والے اداروں میں ہفتے میں کم از کم دو دن 'گھورک فرام ہوم' کا نظام اپنانے کی ضرورت پر بھی زور دیا۔

توانائی کے تحفظ اور ماحولیاتی توازن کو حکومتی ترجیحات قرار دیتے ہوئے وزیراعلیٰ نے شمسی توانائی کے وسیع پیمانے پر استعمال اور رہائشی کالونیوں، اسکولوں اور کالجوں تک عوامی آگاہی مہم کو پھیلانے کی ہدایت کی۔ انہوں نے الیکٹرک گاڑیوں کی حوصلہ افزائی کے لیے ایک نئی پالیسی تیار کرنے کی ضرورت پر زور دیا اور صاف اور توانائی سے موثر نقل و حمل کے نظام کو فروغ دینے کی ضرورت پر زور دیا۔

وزیراعلیٰ نے سماجی تقریبات میں کفایت شعاری اور مقامی معیشت کے فروغ کا پیغام بھی دیا۔ انہوں نے کہا کہ شادی بیاہ اور دیگر تقریبات کے لیے گھریلو مقامات کو ترجیح دی جائے، تاکہ غیر ضروری اخراجات کو روکا جائے اور مقامی روزگار کو فروغ ملے۔ 'ووکل فار لوکل' کے اصول کو عملی جامہ پہنانے پر زور دیتے ہوئے وزیر اعلیٰ نے کہا کہ وزراءکو صرف ان اشیاء کو بطور تحفہ استعمال کرنا چاہئے جو اتر پردیش میں تیار کی جاتی ہیں۔ انہوں نے کہا کہ 'ایک ضلع ایک پروڈکٹ' اسکیم کے تحت ریاست میں معیاری مقامی مصنوعات کی بھرپور رینج دستیاب ہے، جس کو ترجیح دی جانی چاہیے۔

وزیر اعلیٰ نے ہدایت کی کہ ایل پی جی سلنڈروں پر پی این جی کنکشن کو ترجیح دی جائے اور فوری طور پر ضروری پالیسی تبدیلیاں کی جائیں۔ انہوں نے تجارتی ایل پی جی صارفین کو پی این جی سے جوڑنے کی ضرورت پر بھی زور دیا۔

درآمدی اشیاء کے استعمال کو کم سے کم کرنے کی ضرورت پر زور دیتے ہوئے وزیر اعلیٰ نے تیل کے بیجوں کی پیداوار، قدرتی کاشتکاری اور کیمیائی کھادوں کے متوازن استعمال کو فروغ دینے کی ضرورت پر زور دیا۔ انہوں نے خوردنی تیل کی کھپت کو کم کرنے اور اس مسئلے کے بارے میں عوامی بیداری بڑھانے پر زور دیا۔ انہوں نے سونے کی غیر ضروری درآمدات کی حوصلہ شکنی اور بارش کے پانی کے تحفظ کو ایک عوامی تحریک بنانے کی بھی اپیل کی۔

اجلاس کے آغاز میں وزیر اعلیٰ نے کابینہ میں شامل ہونے والے نئے وزراءکا باقاعدہ تعارف کرایا۔ انہوں نے کہا کہ حکومت کی تمام شاخوں میں عوامی نمائندوں کا احتساب سب سے زیادہ ہوتا ہے اور عوام روزانہ لیڈروں اور وزراءکے کام کا جائزہ لیتے ہیں۔ انہوں نے مزید کہا کہ عوامی نمائندے کا طرز عمل عوام کے لیے سب سے طاقتور پیغام کا کام کرتا ہے۔

وزیر اعلیٰ نے نو تعینات وزراء سے خطاب کرتے ہوئے کہا کہ یہ ایک اہم ذمہ داری ہے، اور آئندہ اسمبلی انتخابات کے پیش نظر وقت نسبتاً کم ہے۔ اس لیے تمام وزراء کو مختصر مدت میں شاندار کارکردگی پیش کرنی چاہیے۔ انہوں نے نئے وزراء کو مشورہ دیا کہ وہ سینئر اور تجربہ کار وزراءکے ساتھ رابطے کو برقرار رکھیں، ان سے سیکھیں اور موثر کام کرنے کی کوشش کریں۔ انہوں نے یہ بھی ہدایت کی کہ کابینہ کے وزراء کو محکمانہ پالیسی کے معاملات پر اپنے ساتھی وزرائے مملکت کا ان پٹ ضرور لینا چاہیے۔

---------------

ہندوستان سماچار / عبدالسلام صدیقی