نئی دہلی،(ہ س)۔

جیمز اینڈ جیولری ایکسپورٹ پروموشن کونسل (جی جے ای پی سی) نے بدھ کے روز کہا کہ سونے پر درآمدی ڈیوٹی بڑھانے سے درآمدات میں کمی نہیں آتی بلکہ قیمتوں میں اضافہ ہوتا ہے۔ کونسل نے مرکزی حکومت سے اپیل کی ہے کہ وہ اس کے مستقل حل کے لیے صنعت کے اسٹیک ہولڈرز سے بات چیت کرے۔

جی جے ای پی سی نے بدھ کو ایک بیان میں کہا کہ ڈیوٹی میں اضافہ شاید ہی سونے کی درآمد ی میں کمی لائے۔ یہ صرف قیمت میں اضافہ کرتا ہے۔ حالیہ دنوں میں سونے کی قیمتوں میں دوگنا ہونے کے باوجود درآمدات میں کوئی کمی نہیں آئی ہے۔ کونسل کے مطابق، زیادہ محصولات اسمگلنگ کی حوصلہ افزائی کرتے ہیں اوربرآمدی لاگت میں اضافہ کرتے ہیں۔ ساتھ ہی برآمد کنندگان کو اب نامزد ایجنسیوں سے ڈیوٹی فری سونے کی خریداری پر 28-30 لاکھ روپے فی کلو کی بینک گارنٹی دینی پڑ رہی ہے، جس سے ورکنگ کیپٹل بری طرح متاثر ہو رہا ہے۔

جی جے ای پی سی نے نشاندہی کی کہ سب سے زیادہ شدید اثر مائیکرو، چھوٹے اور درمیانے درجے کے کاروباری اداروں (ایم ایس ایم ای) کے مینوفیکچررز پر پڑے گا۔ بیان میں کہا گیا ہے کہ کونسل کے 80 فیصد اراکین ہیں جنہیں’شدید لیکویڈیٹی بحران‘ کا سامنا ہے۔

حکومت نے آج سونے اور چاندی پر درآمدی ڈیوٹی چھ فیصد سے بڑھا کر 15 فیصد کر دی۔ پلاٹینم پر ٹیکس 6.4 فیصد سے بڑھا کر 15.4 فیصد کر دیا گیا ہے۔ اس کے نتیجے میں سونے/چاندی کے دھاگوں، سکوں، دیگر اشیاء وغیرہ پر ٹیکس میں بھی تبدیلیاں ہوئی ہیں۔

ہندوستھان سماچار

ہندوستان سماچار / Mohammad Khan