وزیر کھیل سارنگ نے بھی سیکورٹی گاڑیاں ہٹا دیں

بھوپال، 13 مئی (ہ س)۔

وزیراعظم نریندر مودی کی جانب سے ایندھن کے تحفظ اور پیٹرول و ڈیزل کے متوازن استعمال کی اپیل کا اثر مدھیہ پردیش کی حکومت میں واضح طور پر نظر آنے لگا ہے۔ وزیراعلیٰ ڈاکٹر موہن یادو سے لے کر ان کی کابینہ کے ساتھیوں نے اپنے سیکورٹی قافلے (کارکیڈ) اور گاڑیوں کی تعداد میں بڑی کٹوتی کرنے کا فیصلہ کیا ہے۔

وزیراعلیٰ ڈاکٹر موہن یادو کے قافلے میں پہلے 13 گاڑیاں چلتی تھیں، جنہیں اب کم کرکے صرف 7 کر دی گئی ہے۔ بدھ کو جب وزیراعلیٰ بھوپال سے نرسنگھ پور کے لیے روانہ ہوئے، تو ان کے کارکیڈ میں صرف سات گاڑیاں ہی نظر آئیں۔ وزیراعلیٰ نے یہ قدم قومی مفاد اور معیشت کو مضبوطی دینے کے مقصد سے اٹھایا ہے۔

نائب وزیراعلیٰ راجیندر شکلا نے بھی اپنے قافلے میں گاڑیوں کی تعداد کم سے کم رکھنے کا اعلان کیا ہے۔ انہوں نے سوشل میڈیا کے ذریعے معلومات دی کہ محکمانہ دوروں، معائنے اور سرکاری سرگرمیوں میں کم سے کم گاڑیوں کا استعمال ہوگا۔ غیر ضروری گاڑیوں کی ریلیوں اور اضافی قافلوں سے پرہیز کیا جائے گا۔ انہوں نے بتایا کہ محکمانہ افسران کو ’کار پولنگ‘ (مشترکہ گاڑی کا انتظام) اور عوامی ٹرانسپورٹ کو ترجیح دینے کی ہدایات دی گئی ہیں۔ انہوں نے صحت کے تحفظ کے لیے قدرتی کھیتی اور ماحولیاتی تحفظ کو بھی اس مہم سے جوڑا ہے۔

انہوں نے کہا کہ صحت کے شعبے میں صاف ماحول اور محفوظ خوراک کا بھی براہِ راست تعلق ہے۔ اسی نقطہ نظر سے قدرتی کھیتی کو فروغ دینا ضروری ہے، تاکہ کیمیائی کھادوں (جو زیادہ تر درآمد کی جاتی ہیں) کا استعمال کم ہو، زمین اور پانی کے معیار کو تحفظ ملے اور عام لوگوں کو صحت بخش اناج دستیاب ہو۔ یہ عوامی صحت کے تحفظ کی سمت میں بھی ایک اہم قدم ہے۔ نائب وزیراعلیٰ شکلا نے کہا کہ محکمانہ افسران سے توقع ہے کہ وہ توانائی کے تحفظ کے ساتھ ماحولیاتی تحفظ کے اس پیغام کو بھی عوامی آگاہی مہمات میں شامل کریں۔ ایندھن کی بچت، صاف ستھرا ماحول اور قدرتی زراعت، یہ سب صحت مند معاشرے اور مضبوط قوم کی بنیاد ہیں۔ قومی مفاد سب سے مقدم ہے۔ ہر چھوٹی بچت ملک کی بڑی طاقت بنتی ہے۔

کھیل اور تعاون کے وزیر وشواس سارنگ نے سادگی کی مثال پیش کرتے ہوئے اپنے سیکورٹی قافلے سے پائلٹ اور فالو گاڑیوں کو ہٹا دیا ہے۔ وہ اپنی ذاتی کار میں اسٹاف کے ساتھ وزارت پہنچے۔ وزیر سارنگ نے کہا کہ وزیراعظم کی یہ پکار ملک کی نو تعمیر اور آنے والی نسل کو ایک ترقی یافتہ اور خود کفیل ہندوستان دینے کے لیے ہے۔ انہوں نے بی جے پی کارکنوں سے بھی کم سے کم پیٹرول و ڈیزل استعمال کرنے کی اپیل کی ہے۔

مدھیہ پردیش حکومت کے اس قدم کا بنیادی مقصد سرکاری اخراجات میں کٹوتی کرنا، ماحول کو آلودگی سے بچانا اور ایندھن کی درآمد پر ملک کا انحصار کم کرنا ہے۔

ہندوستھان سماچار

---------------

ہندوستان سماچار / انظر حسن