اسرائیل میں نیپالی سفارت خانے نے اپنے شہریوں کے لیے ہائی الرٹ جاری کیا

کاٹھمانڈو، 08 اپریل (ہ س)۔ اسرائیل میں واقع نیپالی سفارت خانے نے اسرائیل کے مختلف علاقوں میں رہ رہے نیپالی شہریوں کے لیے ایک ہائی الرٹ پیغام جاری کرتے ہوئے ان سے تحمل، ہوشیاری اور محفوظ طریقے سے رہنے کی اپیل کی ہے۔ نیپالی سفارت خانے نے بدھ کو آٹھ نکات پر مشتمل ایک ’انتہائی ضروری‘ ایڈوائزری جاری کر کے یہ درخواست کی ہے۔ ہنگامی صورتحال میں مدد کے لیے سفارت خانے نے سیکنڈ سکریٹری کمار بہادر شریسٹھ اور تھرڈ سکریٹری سنج کمار شاہ سے موبائل فون کے ذریعے رابطہ کرنے کو کہا ہے۔

سفارت خانے کی جانب سے جاری کردہ بیان کے مطابق، سیکنڈ سکریٹری کمار بہادر شریسٹھ کا رابطہ نمبر 535360748-972+ اور تھرڈ سکریٹری سنج کمار شاہ کا رابطہ نمبر 545582077-972+ ہے۔ سفارت خانے نے ہوم فرنٹ کمانڈ سمیت اسرائیل حکومت اور اس کے سرکاری اداروں کی جانب سے جاری کردہ ہدایات اور معلومات پر عمل کرنے کی بھی درخواست کی ہے۔

ساتھ ہی، الرٹ ایس ایم ایس موصول ہونے یا خطرے کا اشارہ دینے والے سائرن بجنے پر لاپرواہی نہ کرتے ہوئے فوری طور پر اپنے قریبی بم شیلٹر میں جانے کا مشورہ دیا گیا ہے۔

اسرائیل میں مقیم نیپالی شہریوں سے کہا گیا ہے کہ وہ اپنا پاسپورٹ، شناختی کارڈ، ڈرائیونگ لائسنس، بینک کارڈ وغیرہ جیسے اہم دستاویزات ہمیشہ اپنے پاس رکھیں اور تازہ ترین صورتحال سے باقاعدگی سے باخبر رہیں۔

اس کے علاوہ، سوشل میڈیا پر شیئر کی جانے والی جنگ سے متعلق ویڈیوز کو غیر ضروری طور پر شیئر نہ کرنے اور اپنے دوستوں، خاندان اور رشتہ داروں کے ساتھ باقاعدگی سے رابطے میں رہنے کی بھی اپیل کی گئی ہے۔

ہندوستھان سماچار

---------------

ہندوستان سماچار / انظر حسن