اتر پردیش کے کئی اضلاع میں آندھی اور بارش کا الرٹ، 40-30 کلومیٹر فی گھنٹہ کی رفتار سے ہوائیں چلیں گی

پریاگ راج، 08 اپریل (ہ س)۔ اتر پردیش کے پریاگ راج ضلع سمیت 51 اضلاع میں بدھ کو تیز ہواوں کے ساتھ ہلکی بارش کا امکان ہے۔ یہی نہیں بلکہ کچھ مقامات پر آسمانی بجلی گرنے کا بھی خدشہ ہے۔ محکمہ موسمیات کی جانب سے ایسی پیشین گوئی کی گئی ہے۔ ہندوستانی محکمہ موسمیات کے لکھنو مرکز نے وارننگ جاری کی ہے۔

چندر شیکھر آزاد یونیورسٹی آف ایگریکلچر اینڈ ٹیکنالوجی کے ماہرِ موسمیات ڈاکٹر ایس این سنیل پانڈے نے موسم کی پیشین گوئی جاری کرتے ہوئے آندھی، ہلکی بارش اور آسمانی بجلی کی وارننگ دی ہے۔ پیش گوئی کے مطابق، 08 اپریل کی صبح تک ریاست کے مشرقی اور وسطی حصوں میں ہلکی گرج چمک کے ساتھ بارش کا امکان ہے۔ اس دوران 30 سے 40 کلومیٹر فی گھنٹہ کی رفتار سے تیز ہوائیں چل سکتی ہیں۔

محکمہ موسمیات کے مطابق سون بھدر، مرزا پور، چندولی، پریاگ راج، سنت روی داس نگر، وارانسی، غازی پور، جون پور، بلیا، پرتاپ گڑھ، چترکوٹ، مہوبا، باندہ، کوشامبی، ہمیر پور، فتح پور، جالون، اوریا، کانپور دیہات، کانپور شہر، للت پور، جھانسی، اٹاوہ، اعظم گڑھ، مئو، سلطان پور، امبیڈکر نگر، دیوریا، ایودھیا، گورکھپور، سنت کبیر نگر، بستی، کشی نگر، اناو، لکھنو، بارہ بنکی، قنوج، فرخ آباد، سیتا پور، بہرائچ، گونڈہ، مہاراج گنج، سدھارتھ نگر، بلرام پور، شراوستی، شاہجہاں پور، لکھیم پور کھیری، بریلی اور پیلی بھیت سمیت آس پاس کے علاقوں میں ہلکی گرج چمک کے ساتھ بارش اور تیز ہواؤں کا امکان ہے۔

محکمہ موسمیات نے لوگوں کو محتاط رہنے، کھلے مقامات پر کھڑے نہ ہونے اور آسمانی بجلی کے دوران محفوظ مقامات پر رہنے کا مشورہ دیا ہے۔ کسانوں کو بھی فصلوں اور کٹائی کے کام کے حوالے سے احتیاط برتنے کو کہا گیا ہے۔

ہندوستھان سماچار

---------------

ہندوستان سماچار / انظر حسن