نیویارک،08اپریل(ہ س)۔امریکہ اور ایران کے درمیان ہونے والی دو ہفتوں کی جنگ بندی کا اقوامِ متحدہ کے سکریٹری جنرل انتونیو گوتریس نے خیر مقدم کیا ہے۔ بدھ کے روز ان کے ترجمان اسٹیفن ڈوژارک نے بتایا کہ سکریٹری جنرل نے تمام فریقوں پر زور دیا ہے کہ وہ مشرقِ وسطیٰ میں دیرپا امن کے قیام کے لیے کام کریں۔ ترجمان کے مطابق گوتریس نے مشرقِ وسطیٰ کے حالیہ تنازع کے تمام فریقوں سے مطالبہ کیا ہے کہ وہ بین الاقوامی قانون کے تحت اپنی ذمہ داریوں کو پورا کریں اور جنگ بندی کی شرائط پر عمل درآمد کریں تاکہ خطے میں ایک جامع اور پائے دار امن کی راہ ہموار ہو سکے۔

امریکی صدر ڈونالڈ ٹرمپ نے ایران کو دی گئی اس مہلت کے ختم ہونے سے محض دو گھنٹے قبل دو ہفتوں کی جنگ بندی پر رضامندی ظاہر کی تھی، جس میں انہوں نے تہران کو آبنائے ہرمز کھولنے یا پھر اپنے شہری بنیادی ڈھانچے پر وسیع پیمانے پر حملوں کا سامنا کرنے سے خبردار کیا تھا۔ سوشل میڈیا پر سامنے آنے والا صدر ٹرمپ کا یہ اعلان ان کے اس سخت موقف میں اچانک تبدیلی کو ظاہر کرتا ہے جو انہوں نے اسی روز پہلے اپنایا تھا، جب انہوں نے خبردار کیا تھا کہ اگر مطالبات تسلیم نہ کیے گئے تو آج رات ایک پوری تہذیب فنا ہو جائے گی۔

پاکستان کے وزیر اعظم شہباز شریف نے جنہوں نے اس جنگ بندی کے لیے ثالث کا کلیدی کردار ادا کیا ہے، سوشل میڈیا پلیٹ فارم’ایکس‘پر جاری ایک پیغام میں بتایا کہ انہوں نے ایرانی اور امریکی وفود کو جمعہ کے روز اسلام آباد میں ملاقات کی دعوت دی ہے۔

ہندوستھان سماچار

ہندوستان سماچار / Mohammad Khan