مظفر پور، 8 اپریل (ہ س) ۔بہار پولیس کی اسپیشل ٹاسک فورس (ایس ٹی ایف) نے شراب بندی قانون کی خلاف ورزی کرنے والے مافیا کے خلاف ایک بڑی کامیابی حاصل کی ہے۔ ضلع کے ہتھوڑی تھانہ کے مطلوب اور بد نام زما نہ شراب مافیاراجہ ساہ عرف راجہ گپتا کو ایس ٹی ایف کی ایک خصوصی ٹیم نے مظفر پور ریلوے اسٹیشن احاطے سے گرفتار کیا۔

معلومات کے مطابق پولیس ہیڈکوارٹر (ایس ٹی ایف) کو خفیہ اطلاع ملی کہ راجہ ساہ طویل عرصے سے مفرور مجرم ہے، ریلوے اسٹیشن کے قریب موجود ہے۔ اس اطلاع کی بنیاد پر ایس ٹی ایف کی ٹیم نے جال بچھا کر 7/8 اپریل 2026 کی درمیانی رات کو علاقے میں چھاپہ ماری کی اور اسے گرفتار کر لیا۔ گرفتار مجرم ہتھوڑی تھانہ علاقہ کے بیرئی کا رہنے والا ہے اور اس کے والد کا نام رام بنود ساہ ہے۔

راجہ شاہ کے خلاف مظفر پور ضلع کے مختلف تھانوں میں 16 سے زیادہ مقدمات درج ہیں۔ یہ مقدمات صرف شراب کی اسمگلنگ تک ہی محدود نہیں ہیں بلکہ اس کے خلاف آرمس ایکٹ کے تحت سنگین الزامات بھی درج ہیں۔ وہ ہتھوڑی تھانہ میں بہار امتناعی اور ایکسائز ایکٹ کی دفعہ 30(اے) کے تحت مطلوب تھا۔

اس کی گرفتاری کے وقت پولیس نے 10,695 روپے نقد، دو موبائل فون، تین اضافی سم کارڈ، دو کریڈٹ کارڈ، ایک گھڑی، اور دو انگوٹھیاں برآمد کیں۔ اس کی گرفتاری کے بعد ایس ٹی ایف نے اسے مزید کارروائی کے لیے متعلقہ تھانے کے حوالے کر دیا۔ پولیس اب اس بات کا تعین کرنے کی کوشش کر رہی ہے کہ اس کے نیٹ ورک میں اور کون ملوث ہے اور ضبط کیے گئے سم کارڈ کن مجرمانہ سرگرمیوں کے لیے استعمال کیے جا رہے تھے۔ اس گرفتاری کو مظفر پور میں شراب مافیا کے نیٹ ورک کو توڑنے کی سمت میں ایک اہم قدم قرار دیا جا رہا ہے۔

ہندوستھان سماچار

ہندوستان سماچار / Mohammad Afzal Hassan