ناسک ، 8 اپریل (ہ س) ناسک میونسپل کارپوریشن نے پیتھ روڈ پر واقع متنازعہ غیرقانونی دکان کو متعدد نوٹسز اور انتباہات کے باوجود نہ ہٹانے پر آخرکار مسمار کر دیا، جس پر مقامی شہریوں نے اطمینان کا اظہار کیا۔ یہ کارروائی بدھ کی صبح پنچوٹی علاقے میں کیلاش مٹھ کی دیوار سے متصل ایک دکان کے خلاف کی گئی، جو کئی سال سے مبینہ طور پر تجاوزات کے زمرے میں آتی تھی۔
میونسپل حکام کے مطابق متعلقہ دکاندار کو پہلے دو مرتبہ نوٹس جاری کیے گئے تھے اور زبانی طور پر بھی سمجھایا گیا تھا، تاہم اس نے کسی بھی ہدایت پر عمل نہیں کیا۔ ذرائع کے مطابق اس معاملے پر کیلاش مٹھ کے ذمہ داران اور مقامی شہریوں کی جانب سے بھی مسلسل شکایات کی جا رہی تھیں، جن میں اس دکان سے ہونے والی پریشانیوں کی نشاندہی کی گئی تھی۔
قبل ازیں میونسپل کارپوریشن نے انتخابی دور میں بھی اس تجاوز کو ہٹانے کی کوشش کی تھی، تاہم دکاندار کے حامیوں کے احتجاج کے باعث کارروائی روک دی گئی تھی، جس میں ایک سینئر سیاسی رہنما کی مداخلت بھی سامنے آئی تھی۔ آخرکار بدھ کے روز حکام نے آخری موقع دیتے ہوئے دکاندار کو سامان ہٹانے کی ہدایت دی، جس کے بعد جے سی بی مشین کی مدد سے تجاوزات کو مسمار کر دیا گیا۔ اس دوران علاقے میں پولیس کی بھاری نفری تعینات کی گئی تھی تاکہ کسی بھی ناخوشگوار واقعے سے بچا جا سکے۔
میونسپل کمشنر منیشا کھتری کی رہنمائی میں انسداد تجاوزات شعبے کی نائب کمشنر سُورنہ دکھنے اور دیگر افسران کی موجودگی میں یہ کارروائی انجام دی گئی۔ اطلاعات کے مطابق متعلقہ دکاندار کا تعلق ایک سابق بی جے پی کارپوریٹر کے خاندان سے تھا اور اسے طویل عرصے سے سیاسی سرپرستی حاصل تھی، تاہم اس بار سخت کارروائی کی گئی۔
مقامی شہریوں نے اس اقدام کا خیرمقدم کرتے ہوئے امید ظاہر کی ہے کہ شہر میں تجاوزات کے خلاف ایسی کارروائیاں آئندہ بھی جاری رہیں گی۔
ہندوستھان سماچار
--------------------
ہندوستان سماچار / جاوید این اے
