نئی دہلی ، 8 اپریل (ہ س)۔ بھارتیہ جنتا پارٹی (بی جے پی) کا ایک وفد بدھ کو چیف الیکشن کمیشن پہنچا۔ پارٹی رہنماو¿ں نے مغربی بنگال کی وزیر اعلیٰ ممتا بنرجی اور ترنمول کانگریس کے رہنما ابھیشیک بنرجی کے خلاف چار صفحات پر مشتمل شکایت درج کرائی۔ وفد میں مرکزی وزرا وریندر کمار اور ارجن میگھوال اور بی جے پی کے جنرل سکریٹری ارون سنگھ شامل تھے۔

بی جے پی نے الزام لگایا ہے کہ ممتا بنرجی نے انتخابی ریلیوں میں ایسے بیانات دیئے ہیں جس سے لوگوں میں خوف اور الجھن پھیل سکتی ہے۔ شکایت کے مطابق ، ایک ریلی میں، ممتا بنرجی نے کہا، 200 سی آر پی ایف کی گاڑیاں لوگوں پر حملہ کرنے آ رہی ہیں۔ ایک اور ریلی میں، انہوں نے الزام لگایا، ’ سی آر پی ایف کی گاڑیوں میں پیسہ پہنچایا جا رہا ہے۔ ‘

بی جے پی نے اپنی شکایت میں کہا ہے کہ اس طرح کے بیانات سے مرکزی سیکورٹی فورسز کی شبیہ خراب ہوتی ہے، عوام میں خوف پیدا ہوتا ہے اور انتخابات کی شفافیت پر اثر پڑتا ہے۔ بی جے پی نے مطالبہ کیا ہے کہ الیکشن کمیشن آف انڈیا اس معاملے کی تحقیقات کرے اور مناسب کارروائی کرے۔کمیشن سے ملاقات کے بعد میڈیا سے بات کرتے ہوئے بی جے پی لیڈر ارون سنگھ نے الزام لگایا کہ ممتا بنرجی نے مبینہ طور پر سی آر پی ایف اہلکاروں کے خلاف تشدد بھڑکانے والا بیان دیا ہے۔

ارون سنگھ نے کہا کہ ابھیشیک بنرجی کی جانب سے بی جے پی کارکنوں اور حامیوں کے اعضائ توڑنے کی دھمکیاں جمہوریت کے لیے گہری تشویشناک ہیں۔ بی جے پی نے الیکشن کمیشن سے دونوں لیڈروں کے خلاف ایف آئی آر درج کرنے ، سخت کارروائی کرنے اور الیکشن کے دوران ان پر بولنے پر پابندی لگانے کا مطالبہ کیا ہے۔

ہندوستھان سماچار

ہندوستان سماچار / Mohammad Khan