ممتا بنرجی نے بدھ کو بھوانی پور اسمبلی سیٹ سے ترنمول کانگریس کے امیدوار کے طور پر اپنا پرچہ نامزدگی داخل کیا
کولکاتا، 08 اپریل (ہ س): مغربی بنگال کی وزیر اعلیٰ ممتا بنرجی نے بدھ کو بھوانی پور اسمبلی سیٹ سے ترنمول کانگریس کے امیدوار کے طور پر اپنا پرچہ نامزدگی داخل کیا اور کہا کہ ان کی زندگی اسی علاقے سے شروع ہوئی ہے۔
اپنی نامزدگی داخل کرنے سے پہلے، ممتا بنرجی نے اپنی کالی گھاٹ رہائش گاہ سے علی پور سروے ہاو¿س تک روڈ شو کیا۔ ریلی میں حامیوں کی ایک بڑی تعداد نے شرکت کی اور ترنمول کانگریس اور بنرجی کی حمایت میں نعرے لگائے۔
وزیر اعلیٰ تقریباً 800 میٹر پیدل چل کر نامزدگی مرکز پہنچیں۔ اس دوران انہوں نے کارکنوں کا ہاتھ جوڑ کر استقبال کیا۔ اپنا پرچہ نامزدگی داخل کرنے کے بعد ممتا بنرجی نے کہا، میں بھوانی پور میں پیدا ہوئی اور پرورش پائی۔ میری زندگی کا ہر آغاز یہاں سے ہوا ہے۔
انہوں نے نہ صرف بھوانی پور بلکہ ریاست بھر کی تمام 294 سیٹوں پر ترنمول کانگریس کے لیے حمایت کی اپیل کی۔ انہوں نے کہا، میں ریاست کے لوگوں سے اپیل کرتی ہوں کہ وہ ہمارے امیدواروں کی جیت کو یقینی بنائیں۔ اس بار ہم اس سے بھی بڑے مینڈیٹ سے جیتیں گے۔ غور طلب ہے کہ 2021 کے اسمبلی انتخابات میں ترنمول کانگریس نے 213 سیٹیں جیتی تھیں۔
ووٹر لسٹ سے ناموں کے حذف ہونے پر تشویش کا اظہار کرتے ہوئے وزیراعلیٰ نے کہا کہ ان کی پارٹی اس معاملے پر دوبارہ عدالت سے رجوع کرے گی۔ مجھے فہرست سے بہت سے ووٹرز کے ناموں کے حذف ہونے پر دکھ ہوا ہے۔ ووٹر لسٹ منجمد کرنے کی وجہ سمجھ سے بالاتر ہے۔ ہم اس کے خلاف دوبارہ عدالت سے رجوع کریں گے۔
ممتا بنرجی، جو تین بار بھوانی پور سے ایم ایل اے رہ چکی ہیں، توقع ہے کہ اس بار ان کا مقابلہ بھارتیہ جنتا پارٹی (بی جے پی) کے امیدوار شبھیندو ادھیکاری سے ہوگا۔
نامزدگی کے دوران کولکاتا کے میئر فرہاد حکیم کی اہلیہ روبی حکیم، وارڈ 71 ترنمول کانگریس کے صدر ببلو سنگھ، بھوانی پور ایجوکیشن سوسائٹی کے معراج شاہ اور اہل خانہ بھی موجود تھے۔
ترنمول کانگریس نے ممتا بنرجی کی نامزدگی اور روڈ شو کو بھوانی پور کے سماجی اتحاد کی علامت قرار دیا۔ پارٹی کے مطابق، گجراتی تاجر، بنگالی خاندان، پنجابی برادری، اور مسلم کمیونٹی اس علاقے میں طویل عرصے سے اکٹھے رہتے ہیں، جو اسے ریاست کی جامع ثقافت کی ایک مثال بناتا ہے۔
294 رکنی مغربی بنگال اسمبلی کے لیے ووٹنگ دو مرحلوں میں 23 اور 29 اپریل کو ہوگی، جب کہ ووٹوں کی گنتی 4 مئی کو ہوگی۔
---------------
ہندوستان سماچار / عبدالسلام صدیقی
