پٹنہ، 6 اپریل (ہ س)۔ جنتا دل یونائیٹڈ (جے ڈی یو) کے ریاستی صدر امیش سنگھ کشواہا نے راشٹریہ جنتا دل (آر جے ڈی) لیڈر تیجسوی یادو پر سخت حملہ کیا۔ انہوں نے کہا کہ بہار میں 2016 سے مکمل پابندی کے نفاذ کے باوجود جولائی 2023 سے جنوری 2024 کے درمیان ان کی پارٹی کو شراب کمپنیوں سے تقریباً 46.64 کروڑ روپے کے چندے ملے ہیں جو ان کی پارٹی کی سیاسی غربت اور اخلاقی گراوٹ کو ظاہر کرتی ہے۔پیرکے روز جاری کردہ ایک بیان میں کشواہا نے کہا کہ جب کسی پارٹی کی سیاست شراب کمپنیوں کے عطیات پر منحصر ہوتی ہے تو ان کے لیڈروں کے لیے ان مفادات کا تحفظ کرنا فطری ہے۔ یہی وجہ ہے کہ تیجسوی یادو امتناع جیسے عوامی فلاحی فیصلے کے خلاف بے بنیاد بیانات دے کرعوام میں الجھن پھیلانے کی کوشش کررہے ہیں۔ تاہم ان کا منصوبہ کبھی کامیاب نہیں ہوگا۔امیش کشواہا نے کہا کہ ریاست میں مکمل امتناع کے نفاذ کے بعد سے کئی آزاد سروے میں مثبت نتائج سامنے آئے ہیں۔ چانکیا نیشنل لاء یونیورسٹی اور انوگرہ نارائن انسٹی ٹیوٹ آف سوشل اسٹڈیز کی طرف سے مشترکہ طور پر کرائے گئے ایک سماجی سروے میں90 فیصد سے زیادہ جواب دہندگان نے ممانعت کی حمایت کی اور اسے عوام کے لیے فائدہ مند قرار دیا۔ اس کے علاوہ 80 فیصد جواب دہندگان نے اس بات سے اتفاق کیا کہ خواتین اب اکیلے بازار جانے میں زیادہ آزاد محسوس کرتی ہیں۔ مزید برآں، ممانعت نے بچتوں میں اضافہ کیا ہے اور زندگی کو خوشگواربنا دیا ہے۔ ایک اور رپورٹ کا حوالہ دیتے ہوئے انہوں نے بتایا کہ امتناع کے نفاذ کے بعد جنسی تشدد کے واقعات میں 3.6 فیصد کمی آئی ہے اور خواتین کے خلاف جرائم میں بھی نمایاں کمی آئی ہے۔ ریاستی صدر نے کہا کہ پابندی سے نہ صرف سماجی ماحول میں بہتری آئی ہے بلکہ نوجوانوں کی صحت پر بھی اس کے مثبت اثرات مرتب ہوئے ہیں۔ انہوں نے الزام لگایا کہ اپوزیشن ان کامیابیوں کو نظر انداز کر رہی ہے اور صرف اور صرف سیاسی فائدے کے لیے گمراہ کن پروپیگنڈہ کر رہی ہے جسے عوام بخوبی سمجھتے ہیں۔ہندوستھان سماچار

ہندوستان سماچار / Mohammad Afzal Hassan