نانڈیڑ ممبئی ، 6 اپریل (ہ س) نانڈیڑ ضلع میں پولیس نے خفیہ اطلاع پر کارروائی کرتے ہوئے 1470 کلو گرام قیمتی چندن، ایک گاڑی اور نقد رقم سمیت 51 لاکھ 96 ہزار مالیت کا سامان ضبط کر کے پانچ افراد کے خلاف مقدمہ درج کر لیا ہے۔پولیس کے مطابق لاتوٗر سے مدھیہ پردیش کے برہانپور کی جانب چندن کی غیر قانونی نقل و حمل کی اطلاع ملی تھی، جس پر پولیس کے خصوصی دستے نے لوہا علاقے میں کارروائی انجام دی۔لوہا-نانڈیڑ روڈ پر سائی ہوٹل کے قریب مشتبہ ایشَر گاڑی کو روک کر تلاشی لی گئی۔ ابتدا میں گاڑی کو خالی ظاہر کرنے کی کوشش کی گئی، تاہم تفصیلی جانچ کے دوران ڈرائیور کے پیچھے ایک خفیہ خانہ پایا گیا۔ جب ترپال ہٹا کر دیکھا گیا تو اس کے نیچے بوریوں میں چھپایا گیا چندن برآمد ہوا۔ ضبط شدہ چندن کا وزن 1470 کلو گرام بتایا گیا ہے، جس کی مالیت تقریباً 36 لاکھ 75 ہزار روپے ہے۔اس کے علاوہ پولیس نے ایشر گاڑی اور 11 ہزار روپے نقد رقم بھی ضبط کی، جس کے ساتھ کل ضبط شدہ مال کی قیمت 51 لاکھ 96 ہزار روپے بتائی گئی ہے۔ اس معاملے میں لوہا پولیس اسٹیشن میں پانچ افراد کے خلاف مقدمہ درج کر کے مزید تفتیش شروع کر دی گئی ہے۔پولیس نے غیر قانونی سرگرمیوں پر قابو پانے کے لیے “خبر” ہیلپ لائن شروع کرنے کا بھی اعلان کیا ہے اور عوام سے اپیل کی ہے کہ وہ 91 50 100 100 نمبر پر اطلاع دے کر پولیس کا تعاون کریں۔ہندوستھان سماچار

--------------------

ہندوستان سماچار / جاوید این اے