جموں, 05 اپریل (ہ س)شمالی ریلوے کے تحت قائم جموں ڈویژن اب مکمل طور پر فعال ہو گیا ہے اور اس کے بیشتر آپریشنل و مالیاتی نظام منتقل کر دیے گئے ہیں۔ حکام کے مطابق آئندہ سال مسافروں کی سہولیات میں بہتری، ٹرین آپریشنز میں حفاظت، بنیادی ڈھانچے کی توسیع اور فریٹ لوڈنگ میں اضافہ ترجیحات میں شامل ہوں گے۔

ڈویژنل ریلوے منیجر ویوک کمار نے بتایا کہ جموں ڈویژن، جو مالی سال 2025-26 میں فیروزپور ڈویژن سے تنظیم نو کے بعد قائم کیا گیا، قلیل عرصے میں نمایاں پیش رفت کر چکا ہے اور اب مکمل ڈویژن کے طور پر کام کر رہا ہے۔

انہوں نے کہا کہ انڈین ریلوے نے رواں سال تقریباً 1.7 ارب ٹن فریٹ لوڈنگ کا ریکارڈ حاصل کیا ہے۔ جموں و کشمیر میں ریلوے نیٹ ورک میں بھی نمایاں توسیع ہوئی ہے اور کئی غیر منسلک لائنوں کو مرکزی نیٹ ورک سے جوڑ دیا گیا ہے۔ویوک کمار کے مطابق کٹرا-بانہال سیکشن، جس میں چناب برج اور انجی کھڈ برج شامل ہیں، اُن کے فعال ہونے سے خطے میں رابطہ مزید بہتر ہوا ہے، جبکہ وندے بھارت ایکسپریس ٹرینیں کٹرا اور سرینگر کے درمیان کامیابی سے چل رہی ہیں۔انہوں نے بتایا کہ ہنگامی حالات میں بھی ریلوے نے اہم کردار ادا کیا، جہاں سیلاب اور دیگر حالات کے دوران مسافروں کے انخلاء اور اشیائے ضروریہ کی ترسیل کو یقینی بنایا گیا۔ کشمیر سے تقریباً 20 ہزار ٹن سیب دہلی منڈیوں تک پہنچائے گئے، جس سے مقامی باغبانی شعبے کو فائدہ ہوا۔حکام کے مطابق جموں ڈویژن اب انتظامی طور پر خود کفیل ہو چکا ہے اور تمام مالیاتی امور یہیں سے انجام دیے جا رہے ہیں، جبکہ مستقبل میں مزید بہتری اور توسیع کے امکانات پر غور جاری ہے۔

ہندوستھان سماچار

---------------

ہندوستان سماچار / محمد اصغر