بھوپال، 05 اپریل (ہ س)۔ مدھیہ پردیش میں موسم نے اچانک کروٹ لے لی ہے۔ ریاست میں اولے، بارش اور تیز آندھی کا مضبوط سسٹم سرگرم ہو گیا ہے۔ ہفتہ کو بیتول، شیوپور اور مرینا سمیت 08 سے 10 اضلاع میں اولہ باری ہوئی۔ وہیں، 20 سے زائد اضلاع میں تیز آندھی کے ساتھ بارش بھی درج کی گئی۔ اتوار کو بھی ایسے ہی حالات برقرار رہنے کا امکان ہے۔ گوالیار سمیت 27 اضلاع میں آندھی اور بارش کا الرٹ ہے۔

محکمہ موسمیات نے بتایا کہ اگلے 24 گھنٹوں میں جن اضلاع میں موسم کا اثر رہے گا، ان میں گوالیار، بھنڈ، مرینا، دتیا، نیواڑی، چھترپور، پنا، ستنا، ریوا، مئو گنج، سیدھی، سنگرولی، میہر، امریا، شہڈول، انوپ پور، ڈنڈوری، منڈلا، بالا گھاٹ، سیونی، چھندواڑہ، نرمدا پورم، بیتول، ہردا، کھنڈوا، برہان پور اور پانڈھرنا شامل ہیں۔ ان علاقوں میں دوپہر کے بعد موسم بدل سکتا ہے اور 30 سے 60 کلومیٹر فی گھنٹہ کی رفتار سے تیز آندھی چلنے کا اندازہ ہے۔

اس سے پہلے ہفتہ کو صبح سے ہی کئی اضلاع میں بارش شروع ہوئی تھی۔ ریاست میں گردابی سسٹم سرگرم رہا، جس کے باعث دوپہر کے بعد موسم مزید خراب ہو گیا۔ بیتول، شیوپور اور مرینا میں اتنی تیز اولہ باری ہوئی کہ سڑکوں پر سفید چادر سی بچھ گئی۔ دارالحکومت بھوپال میں بھی رات کے وقت موسم بدلا، جبکہ سیہور، ودیشا، رتلام اور رائسین سمیت 20 اضلاع میں بارش اور تیز ہوائیں چلیں۔

محکمہ موسمیات کا کہنا ہے کہ اگلے چار دن یعنی 08 اپریل تک ریاست میں تیز ہوائیں چلتی رہیں گی۔ کچھ علاقوں میں ہوا کی رفتار 50 سے 60 کلومیٹر فی گھنٹہ تک پہنچ سکتی ہے، جبکہ دیگر مقامات پر 30 سے 40 کلومیٹر فی گھنٹہ کی رفتار رہے گی۔ موجودہ موسمی نظام کے ساتھ 07 اپریل سے ایک مغربی ڈسٹربنس بھی سرگرم ہونے جا رہا ہے۔ اس کے اثر سے 10 اور 11 اپریل تک ریاست کے مختلف حصوں میں کہیں آندھی تو کہیں بارش دیکھنے کو مل سکتی ہے۔

اس کے بعد موسم صاف ہوگا اور گرمی کا اثر تیزی سے بڑھے گی۔ اپریل کے دوسرے ہفتے سے ہی تیز گرمی شروع ہونے کے اشارے ہیں۔ مہینے کے آخری ہفتے میں گوالیار، دھار، کھرگون، بڑوانی اور نوگاوں-کھجوراہو جیسے علاقوں میں زیادہ سے زیادہ درجہ حرارت 44 سے 45 ڈگری سیلسیس تک پہنچ سکتا ہے۔ دتیا، مرینا، شیوپور، بڑوانی، کھرگون اور دھار میں بھی درجہ حرارت میں اضافہ ہوگا۔ عام طور پر اپریل میں ریاست کے جنوبی اور مغربی حصوں میں گرم ہوائیں چلتی ہیں، جس سے ان علاقوں میں شدید گرمی پڑتی ہے۔

ہندوستھان سماچار

---------------

ہندوستان سماچار / انظر حسن