علی گڑھ, 05 اپریل (ہ س)۔

علی گڑھ نگر نگم کی جانب سے تقریباً ڈیڑھ کروڑ روپے کی لاگت سے تعمیر کیے جا رہے سنویدھان پارک میں مذہبی پیشوا مہاتما بدھ کا شاندار مجسمہ نصب کیا جائے گا۔ یہ پارک بھارت رتن ڈاکٹر بھیم راؤ امبیڈکر کی زندگی اور آئین سازی میں ان کے عظیم کردار کی یادگار کے طور پر تیار کیا جا رہا ہے۔

اتوار کو نگر آیوکت پریم پرکاش مینا نے پارک کا معائنہ کیا اور متعلقہ محکموں کو ہدایت دی کہ تمام تعمیری کام 12 اپریل تک مکمل کر لیے جائیں تاکہ اسی دن اس کا شاندار افتتاح کیا جا سکے۔

نگر آیوکت نے بتایا کہ اس پارک میں بابا صاحب امبیڈکر کی حیات، ان کی جدوجہد اور آئین کی تشکیل میں ان کی خدمات کو اجاگر کیا جائے گا۔ اس کے ساتھ ہی مہاتما بدھ کی تعلیمات سے بھی عوام کو روشناس کرایا جائے گا۔

پارک کو تعلیمی، ثقافتی اور خوبصورتی کے لحاظ سے منفرد بنانے کے لیے یہاں آئین ہند کی ایک منی بک کو 3-ڈی مولڈڈ ڈیزائن میں نصب کیا جا رہا ہے، جس میں آئین کے اہم نکات اور علامات کو تفصیل کے ساتھ پیش کیا جائے گا تاکہ خاص طور پر نوجوان نسل کو آئینی اقدار کی سمجھ حاصل ہو سکے۔

مزید برآں، سفید سینڈ اسٹون سے تیار کردہ اشوک چکر کی خوبصورت علامتی مجسمہ بھی نصب کی گئی ہے، جو قومی یکجہتی، سیکولرزم اور آئینی اقدار کی نمائندگی کرے گی۔ اس کے علاوہ ایف آر پی (فائبر رینفورسڈ پلاسٹک) میورلز کے ذریعے ڈاکٹر بھیم راؤ امبیڈکر کی زندگی، جدوجہد، نظریات اور سماجی اصلاحات کو بصری انداز میں پیش کیا جائے گا۔

معائنہ کے دوران چیف انجینئر آشیِش شکلا، اسسٹنٹ انجینئر راج ویر سنگھ اور دیگر افسران بھی موجود رہے۔

---------------

ہندوستان سماچار / سید کامران علی گڑھ