امراوتی ممبئی ، 5 اپریل (ہ س) ۔ امراوتی ضلع میں لو (ہیٹ اسٹروک) سے ہونے والی اموات کا ڈیتھ آڈٹ ایک ہفتے کے اندر مکمل کرنا لازمی قرار دیا گیا ہے جبکہ بڑھتی گرمی کے پیش نظر محکمہ صحت نے احتیاطی اقدامات تیز کر دیے ہیں۔ضلعی صحت انتظامیہ کے مطابق شدید گرمی اور لو لگنے کے ممکنہ خطرے کو دیکھتے ہوئے ضلع بھر میں خصوصی ہیٹ اسٹروک کمرے قائم کیے گئے ہیں، جن میں 59 پرائمری ہیلتھ سینٹرز، 9 دیہی اسپتال، 5 سب ڈسٹرکٹ اسپتال، میونسپل حدود میں 13 مراکز اور ایک ضلع سول اسپتال شامل ہے، اس طرح مجموعی طور پر 87 کمرے قائم کیے گئے ہیں۔ ان کمون میں پانی، ابتدائی طبی امداد اور ٹھنڈک فراہم کرنے کی سہولیات موجود ہیں، جبکہ مرکزی حکومت کی ہدایات کے مطابق ہر تعلقہ اور ہر پرائمری ہیلتھ سینٹر کو اپنا ایکشن پلان تیار کرنے کی ہدایت دی گئی ہے۔حکام کے مطابق اگرچہ گزشتہ چند دنوں سے ابر آلود موسم اور غیر موسمی بارش دیکھی جا رہی ہے، تاہم آئندہ دنوں میں شدید گرمی میں اضافہ متوقع ہے جس کے باعث لو لگنے کے واقعات بڑھنے کا خدشہ ہے۔ حکام نے واضح کیا ہے کہ لو سے ہونے والی ہر موت کا جائزہ ضلعی سطح کی ڈیتھ آڈٹ کمیٹی کے ذریعے کیا جائے گا اور ہر کیس کا آڈٹ ایک ہفتے کے اندر مکمل کرنا لازمی ہوگا۔ اسی ہدایت کے تحت محکمہ صحت نے ضلع بھر میں ہیٹ اسٹروک کمرے فعال کر دیے ہیں۔ہندوستھان سماچار

--------------------

ہندوستان سماچار / جاوید این اے