نئی دہلی،05 اپریل (ہ س)۔ نائب صدر جمہوریہ سی پی رادھا کرشنن نے کہا کہ مراقبہ اندرونی تبدیلی کے آغاز کی نشاندہی کرتا ہے، اور یہ کہ ایک بہتر دنیا صرف مثبت سوچ کے ذریعے ہی تعمیر کی جا سکتی ہے۔ مراقبہ ایک فرد کو ذہنی سکون،شفافیت اور مثبت نقطہ نظر سے نوازتا ہے۔ نائب صدر جمہوریہ نے یہ ریمارکس اتوار کے روز نئی دہلی کے بھارت منڈپم میں منعقدہ ’عالمی کانفرنس آف میڈیٹیشن لیڈرس – میڈیٹیشن فار ہولیسٹک لیونگ اینڈ اے پیس فل ورلڈ‘ سے خطاب کرتے ہوئے کہے۔

تقریب سے خطاب کرتے ہوئے — جس کا اہتمام پیرامڈ اسپریچوئل سوسائٹیز موومنٹ اور بدھا-سی ای او کوانٹم فاو¿نڈیشن نے مشترکہ طور پر کیا — نائب صدر نے کہا کہ مراقبہ اپنے اندر چراغ جلانے کے مترادف ہے۔ یہ جہالت کو دور کرتا ہے اور فرد کو سچائی اور امن کی راہ پر گامزن کرتا ہے۔ تمل سنت تھرومولر کی تعلیمات کا حوالہ دیتے ہوئے، انہوں نے مشاہدہ کیا کہ انسانی جسم ایک مندر کی طرح ہے، اور مراقبہ کے ذریعے، ایک فرد اپنے اندر موجودروشنی کو پہچان سکتا ہے۔

موجودہ عالمی منظر نامے کا حوالہ دیتے ہوئے انہوں نے کہا کہ آج دنیا کو بہت سے چیلنجز کا سامنا ہے۔ انہوں نے کہا کہ تنازعہ صرف بیرونی نہیں ہے بلکہ فرد کے اندر بھی برقرار رہتا ہے۔ ایسے وقت میں، مراقبہ امن اور توازن قائم کرنے میں اہم کردار ادا کرتا ہے۔ یہ تناو¿ کو کم کرتا ہے، ارتکاز کو بڑھاتا ہے، اور جذباتی استحکام کو مضبوط کرتا ہے۔

نائب صدر جمہوریہ نے واضح کیا کہ مراقبہ صرف روحانی متلاشیوں کے لیے فائدہ مند نہیں ہے بلکہ ہر فرد کے لیے اہمیت کا حامل ہے۔ یہ عام آدمی کو بھی اعلیٰ شعور کی حالت کی طرف رہنمائی کرنے میں معاون ہے۔ انہوں نے اس بات پر زور دیا کہ مادی کامیابی کے انتھک جستجو کے درمیان، کسی کو زندگی کی بنیادی اقدار کو نظر انداز نہیں کرنا چاہیے، اور یہ کہ مراقبہ اس ضروری توازن کو برقرار رکھنے میں مدد کرتا ہے۔

’وکِسِت بھارت-2047‘ (ترقی یافتہ ہندوستان-2047) کے قومی مقصد کا حوالہ دیتے ہوئے، انہوں نے زور دے کر کہا کہ ملک کی اقتصادی ترقی کے ساتھ ساتھ، ذہنی تندرستی کو ترجیح دینا بھی اتنا ہی ضروری ہے۔ اس سلسلے میں مراقبہ ایک انتہائی موثر آلہ ثابت ہو سکتا ہے۔ نوجوانوں سے خطاب کرتے ہوئے نائب صدر جمہوریہ نے کہا کہ مراقبہ نشے سے چھٹکارا پانے کے لیے ایک طاقتور ہتھیار کے طور پر کام کر سکتا ہے۔ تناو¿، اضطراب اور بے مقصدیت کے احساس کو کم کرکے، یہ نوجوانوں کو صحیح راستے پر گامزن کرتا ہے۔ انہوں نے مزید کہا کہ تشخیص کے بغیر مشاہدہ ذہانت کی اعلیٰ ترین شکل ہے - ایک ایسی صلاحیت جو مراقبہ ایک فرد کو پروان چڑھانے کی طاقت دیتی ہے۔

تقریب میں ڈی آر کارتیکیان (سابق ڈائریکٹر جنرل سی بی آئی اور سی آر پی ایف)، سوامی چدانند سرسوتی (صدر پرمارتھ نکیتن آشرم، رشی کیش)، ڈاکٹر نیوٹن کونڈاوٹی (صدر کوانٹم لائف یونیورسٹی)، چندر پلمارسیٹی (بدھا- سی ای او کوانٹم فاو¿نڈیشن کے بانی)، اور پیرامڈ اسپریچول ٹرسٹ کے صدر و جے بھاسکر ریڈی سمیت متعدد معززین نے شرکت کی۔

---------------

ہندوستان سماچار / عبدالسلام صدیقی