علی گڑھ, 05 اپریل (ہ س)۔

علی گڑھ مسلم یونیورسٹی (AMU) کے جے این میڈیکل کالج آڈیٹوریم میں حج 2026 کے سلسلے میں ایک روزہ تربیتی پروگرام منعقد کیا گیا، جس کا مقصد عازمینِ حج کو مکمل رہنمائی فراہم کرنا تھا۔ پروگرام سے خطاب کرتے ہوئے عبدالصمد (قومی سکریٹری، خدامِ حج کمیٹی اور سابق اسسٹنٹ حج آفیسر) نے کہا کہ حج اسلام کا ایک اہم فریضہ ہے، جو زندگی میں ایک بار صاحبِ استطاعت مسلمان پر فرض ہے۔ انہوں نے عازمین سے اپیل کی کہ وہ تربیت میں دی گئی ہدایات پر سنجیدگی سے عمل کریں تاکہ ان کا سفر محفوظ اور آسان ہو۔

اس سال علی گڑھ سے 430 عازمینِ حج کا انتخاب ہوا ہے، جن میں سے 324 افراد نے اس تربیتی پروگرام میں شرکت کی۔ ان میں 225 مرد اور 109 خواتین شامل تھیں۔ سب سے کم عمر عازم 13 سالہ عمار رہے جبکہ بڑی عمر کے عازمین کی بھی معقول تعداد موجود تھی۔ تربیتی سیشن میں ڈاکٹر شریق عقیل (چیف میڈیکل آفیسر، یونیورسٹی ہیلتھ سروس، AMU) نے مدینہ منورہ کی حاضری، مکہ مکرمہ میں عمرہ، منیٰ، عرفات، مزدلفہ، رمیِ جمرات، قربانی، طوافِ زیارت اور طوافِ وداع سمیت حج کے تمام مراحل کی تفصیل بیان کی۔مزید برآں، عبدالصمد نے حج کمیٹی آف انڈیا کی جانب سے متعارف کرائی گئی سہولیات جیسے 20 روزہ شارٹ حج، حج سہولت ایپ، رسٹ واچ اور نسک ایپ کے بارے میں بھی معلومات فراہم کیں۔ انہوں نے عازمین کو ضروری دستاویزات کی تیاری، سعودی ریال کے انتظام اور روزانہ 2-3 کلومیٹر پیدل چلنے کی مشق کرنے کی بھی تاکید کی۔پروگرام کے اختتام پر عازمینِ حج کے لیے دعائے خیر کی گئی اور ان کے حج کی قبولیت کی دعا مانگی گئی۔

---------------

ہندوستان سماچار / سید کامران علی گڑھ