نئی دہلی، 4 اپریل (ہ س)۔

کرائم برانچ نے ہولی پر فائرنگ کرکے علاقے میں دہشت پھیلانے والے ملزم کو گرفتار کرلیا ہے۔ ملزم کے قبضے سے دو دیسی ساختہ پستول اور چار زندہ کارتوس برآمد ہوئے ہیں۔ ملزم واردات کے بعد سے فرار تھا۔

کرائم برانچ کے ڈپٹی کمشنر آف پولیس پنکج کمار نے ہفتہ کو بتایا کہ گرفتار ملزم کی شناخت مکند پور کے رہنے والے شیوم عرف شیوا کے طور پر کی گئی ہے۔ وہ بھلسا ڈیری پولیس اسٹیشن میں درج فائرنگ کے ایک مقدمے میں مطلوب تھا۔ اس واقعے کی ایک ویڈیو سوشل میڈیا پر وائرل ہوئی جس میں دیکھا جا سکتا ہے کہ ملزم اپنے ہاتھ میں دو پستول لے کر لوگوں کو دھمکیاں دے رہا ہے۔

ڈپٹی کمشنر آف پولیس کے مطابق، 4 مارچ کو ہولی کے دن مکند پور پارٹ 2 میں اروند کمار پانڈے کے ساتھ جھگڑے کے بعد ملزم نے گولی چلائی۔ ملزم نشے میں تھا اور ابتدا میں زبانی تکرار شروع ہوئی۔ اس کے بعد وہ دو دیسی ساختہ پستول لے کر واپس آیا اور قتل کرنے کے ارادے سے فائرنگ کی۔ تاہم متاثرہ شخص بال بال بچ گیا اور اپنے گھر کے اندر فرار ہوگیا۔

واقعے کے بعد ملزم نے علاقے میں ہنگامہ کھڑا کر دیا اور کھڑی گاڑیوں کو نقصان پہنچایا۔ اس کے بعد وہ موقع سے فرار ہوگیا۔ بھلسوا ڈیری پولیس اسٹیشن میں مقدمہ درج کرکے تفتیش شروع کردی گئی۔

ڈپٹی کمشنر آف پولیس کے مطابق کرائم برانچ کی ٹیم نے تکنیکی اور مقامی معلومات کی بنیاد پر ملزم کی شناخت کی اور اس کی تلاش شروع کر دی۔ مسلسل نگرانی کے بعد، 3 اپریل کو، کرائم برانچ نے یو ای آر-2 کے قریب چھاپہ مارا اور ملزم کو پکڑ لیا۔ تلاشی کے دوران اس کے پاس سے دو بھاری بھرکم دیسی ساختہ پستول اور چار زندہ کارتوس برآمد ہوئے۔ کرائم برانچ پولیس اسٹیشن میں آرمز ایکٹ کے تحت ایک اور کیس درج کیا گیا ہے۔

پولیس کے مطابق ملزم اس سے قبل فائرنگ اور قتل جیسے سنگین جرائم سمیت متعدد جرائم کی وارداتوں میں ملوث رہا ہے۔ فی الحال اس سے پوچھ گچھ جاری ہے، اور دیگر کیسوں میں اس کے ملوث ہونے کی تحقیقات کی جارہی ہیں۔

ہندوستھان سماچار

ہندوستان سماچار / عطاءاللہ