نئی دہلی، 03 اپریل (ہ س)۔ ایتھلیٹکس میں ڈوپنگ کے معاملوں کے حوالے سے ہندوستان کے لیے تشویشناک خبر سامنے آئی ہے۔ ایتھلیٹکس انٹیگریٹی یونٹ (اے آئی یو) کی تازہ ترین فہرست کے مطابق، ڈوپنگ کی خلاف ورزیوں کی وجہ سے نااہل قرار دیے گئے کھلاڑیوں کی تعداد میں ہندوستان نےکینیا کو پیچھے چھوڑ دیا ہے۔ ہندوستان کے پاس اس وقت 148 ٹریک اینڈ فیلڈ ایتھلیٹس معطل ہیں جو کینیا سے دو زیادہ ہیں۔ وہیں، روس 66 معطل ایتھلیٹس کے ساتھ تیسرے نمبر پر ہے۔

اس فہرست میں کئی نامور ہندوستانی کھلاڑی بھی شامل ہیں۔ ان میں خواتین کی 100 میٹر کی قومی ریکارڈ ہولڈر دتی چند، جنہیں دسمبر 2022 سے چار سال کی پابندی کا سامنا ہے، درمیانی فاصلے کے رنر پرویز خان، جن کی چھ سالہ پابندی جولائی 2030 تک رہے گی اور تمل ناڈو کی اسپرنٹر سیکر دھن لکشمی، جنہیں 2025 میں آٹھ سال کے لیے معطل کر دیا گیا تھا، اہم نام ہیں۔

اے آئی یو کی فہرست میں نہ صرف ڈوپنگ کیسز میں قصوروار پائے جانے والے ایتھلیٹس شامل ہیں، بلکہ وہ لوگ بھی شامل ہیں جنہوں نے نان ڈوپنگ کی خلاف ورزیاں کی ہیں جیسے ٹیسٹ سے بچنا، نمونوں کے ساتھ چھیڑ چھاڑ، اسمگلنگ، یا اپنی لوکیشن کی معلومات نہیں دینا۔ ان خلاف ورزیوں پر وہی سخت سزائیں ہیں جو ڈوپنگ کی طرح ہیں۔

ایتھلیٹکس انٹیگریٹی یونٹ ایک خود مختار اینٹی ڈوپنگ ادارہ ہے جسے عالمی ایتھلیٹکس نے بین الاقوامی کھلاڑیوں اور ان کے ساتھیوں کی نگرانی کے لیے قائم کیا ہے۔ایتھلیٹکس فیڈریشن آف انڈیا (اے ایف آئی) نے ڈوپنگ کے مسئلے سے نمٹنے کے لیے سخت اقدامات کیے ہیں۔ فیڈریشن ملک بھر میں ایسے تربیتی مراکز کی نشاندہی کر رہی ہے جو ڈوپنگ سرگرمیوں میں ملوث ہیں۔اس کے ساتھ ہی، اے ایف آئی نے تمام کوچز کے لیے رجسٹریشن کو لازمی قرار دیا ہے۔ بغیر رجسٹریشن والے کوچز کو بلیک لسٹ کر دیا جائے گا اور ان کے کھلاڑی قومی ایوارڈز کے لیے نااہل ہو جائیں گے۔

2024 کے پیرس اولمپکس کے بعد، اے ایف آئی نے قومی کیمپوں کی غیر مرکزیت کی ہے۔ فی الحال، قومی کیمپ صرف ریلے ٹیموں کے لیے منعقد کیے جاتے ہیں۔ دیگر اعلیٰ کھلاڑی اب نجی تنظیموں جیسے ریلائنس، جے ایس ڈبلیو، اور ٹاٹا، یا فوج اور بحریہ جیسے سرکاری محکموں کے ساتھ تربیت حاصل کرتے ہیں۔

ہندوستھا ن سماچار

ہندوستان سماچار / محمد شہزاد